അസ്തിത്വ പ്രതിസന്ധി പരിഹരിക്കാൻ​ ഐക്യത്തിന്​ ആഹ്വാനം ചെയ്ത്​ പണ്ഡിത സമ്മേളനം

കൊച്ചി: മുസ്​ലിം സമൂഹം നേരിടുന്ന അസ്തിത്വ പ്രതിസന്ധിക്ക്​ പരസ്പര ഐക്യത്തിലൂടെ പരിഹാരം കാണണമെന്ന്​ ആഹ്വാനം ചെയ്ത്​ പണ്ഡിത സമ്മേളനം. സോളിഡാരിറ്റി യൂത്ത്‌ മൂവ്‌​മെന്റ്‌ സംസ്ഥാന സമ്മേളന ഭാഗമായി 'മുസ്​ലിം ഉമ്മത്ത്​ അസ്തിത്വം അതിജീവനം' വിഷയത്തിൽ നടന്ന മില്ലി കോൺഫറൻസാണ്​ വിവിധ മുസ്​ലിം സംഘടന നേതാക്കൾ ഏക ശബ്​ദമായി ഐക്യത്തിന്​ ആഹ്വാനം ചെയ്തത്​.

മതങ്ങളെ സംവാദത്തിനുള്ള ഇടങ്ങളാക്കി മാറ്റേണ്ടതുണ്ടെന്ന്​ സമ്മേളനം ഉദ്​ഘാടനം ചെയ്ത യൂത്ത്​ ലീഗ്​ സംസ്ഥാന പ്രസിഡന്‍റ്​ മുനവ്വറലി ശിഹാബ് ​തങ്ങൾ പറഞ്ഞു. ഇസ്​ലാമിന്‍റെ സുതാര്യതയും സൗന്ദര്യവും കാണിച്ചുകൊടുക്കാനുള്ള ഉത്തരവാദിത്തം മുസ്​ലിം സമൂഹത്തിനുണ്ട്​. തീവ്രവാദ സമീപനമുള്ള ഒരു സമൂഹവുമായും സന്ധിയാകരുതെന്നും ഇക്കാര്യത്തിലും ഐക്യം അനിവാര്യമാണെന്ന്​ അദ്ദേഹം വ്യക്​തമാക്കി. മുസ്​ലിം സമൂഹത്തിന്​ ആത്​മവിശ്വാസം നൽകുന്ന പരിപാടികൾക്ക്​ നേതൃത്വം നൽകാൻ നേതാക്കൾക്ക്​ കഴിയണമെന്ന്​ അധ്യക്ഷ പ്രസംഗത്തിൽ സോളിഡാരിറ്റി സംസ്ഥാന പ്രസിഡന്‍റ്​ നഹാസ്​ മാള പറഞ്ഞു.

ഖുർആൻ മുറുകെപ്പിടിച്ചും അതിന്‍റെ സന്ദേശം മുഴുവൻ ജനങ്ങളിലെത്തിച്ചും ​ഐക്യത്തോടെ മുന്നേറാൻ കഴിയേണ്ടതുണ്ടെന്ന്​ ഓൾ ഇന്ത്യ മുസ്​ലിം പേഴ്​സനൽ ബോർഡ്​ അംഗം അബ്​ദുൽ ശുക്കൂർ ഖാസിമി ഓർമിപ്പിച്ചു. രാഷ്ട്രീയമായ കെട്ടുറപ്പോടെയും നിയമ പോരാട്ടത്തിലൂടെയും ഒന്നിച്ചുനീങ്ങിയാൽ സമുദായത്തിനുനേരെയുള്ള ബുൾഡോസറുകളെ നേരിടാനാകുമെന്ന്​ കെ.എൻ.എം സംസ്ഥാന സെക്രട്ടറി സലാഹുദ്ദീൻ മദനി അഭിപ്രായപ്പെട്ടു. ഇത്തരം ഒരുമിച്ചിരിക്കലുകൾക്ക്​ തുടർച്ചകൾ ഉണ്ടാകേണ്ടതു​ണ്ടെന്ന്​ ജംഇയ്യത്തുൽ ഉലമായെ ഹിന്ദ്​ കേരള ജനറൽ സെക്രട്ടറി വി.എച്ച്​. അലിയാർ ഖാസിമി പറഞ്ഞു. സമുദായങ്ങൾക്കിടയിൽ അവിശ്വാസവും വെറുപ്പും പ്രചരിക്കപ്പെട്ടാൽ മുഴുവൻ സമൂഹത്തിനുമത് പരിക്കേൽപ്പിക്കുമെന്നും ​അദ്ദേഹം ചൂണ്ടിക്കാട്ടി. ഇസ്​ലാമും മുസ്​ലിംകളുമായി ബന്ധപ്പെട്ട എല്ലാറ്റിനെയും വർഗീയവത്കരിച്ച് വിദ്വേഷ രാഷ്ട്രീയം പ്രചരിപ്പിച്ച് കൊണ്ടിരിക്കുന്ന സന്ദർഭത്തിൽ ഭിന്നിപ്പിന്‍റെ ശക്തികൾക്കെതിരെ സമുദായം ഒന്നിച്ച് നിൽക്കേണ്ടതുണ്ടെന്നും അതിന് യുവാക്കൾ വേദിയൊരുക്കുന്നത്​ പ്രത്യാശജനകമാണെന്നും കേരള മുസ്​ലിം യുവജന ഫെഡറേഷൻ പ്രസിഡന്‍റ്​ ഇലവുപാലം ഷംസുദ്ദീൻ മന്നാനി പറഞ്ഞു.

വിസ്​ഡം ഇസ്​ലാമിക്​ ഓർഗനൈസേഷൻ ജന. സെക്രട്ടറി ടി.കെ. അഷ്​റഫ്​, ജമാഅത്തെ ഇസ്​ലാമി സംസ്ഥാന അസി.അമീർ ശൈഖ്​ മുഹമ്മദ്​ കാരകുന്ന്​, സി.ടി. സുഹൈബ്​ എന്നിവർ സംസാരിച്ചു.