സ്പെഷല്‍ ഡ്രൈവ്: 14.6 കോടിയുടെ മയക്കുമരുന്ന് പിടിച്ചു

തിരുവനന്തപുരം: മയക്കുമരുന്നിനെതിരെ എക്സൈസ് നടത്തുന്ന സ്പെഷല്‍ എൻഫോഴ്സ്മെന്‍റ് ഡ്രൈവിന്‍റെ ഭാഗമായി വെള്ളിയാഴ്ചവരെ 1024 കേസുകളിലായി 1038 പ്രതികളെ അറസ്റ്റ് ചെയ്തതായി മന്ത്രി എം.ബി. രാജേഷ് അറിയിച്ചു.

14.6 കോടി രൂപയുടെ മയക്കുമരുന്നും കസ്റ്റഡിയിലെടുത്തു. 957.7 ഗ്രാം എം.ഡി.എം.എ, 1428 ഗ്രാം മെത്താംഫിറ്റമിൻ, 13.9 ഗ്രാം എൽ.എസ്.ഡി സ്റ്റാമ്പ്, 245.5 ഗ്രാം ഹാഷിഷ് ഓയില്‍, 187.6 ഗ്രാം നർകോട്ടിക് ഗുളികകള്‍, 16 ഇൻജക്ഷൻ ആംപ്യൂളുകള്‍ മുതലായവ പിടിച്ചെടുത്തു. 147.7 കിലോ കഞ്ചാവും 181 കഞ്ചാവ് ചെടിയും കസ്റ്റഡിയിലെടുത്തു. വരുംദിവസങ്ങളിലും ശക്തമായ നടപടി തുടരുമെന്നും മന്ത്രി അറിയിച്ചു.