വാഹനങ്ങളിലെ രൂപമാറ്റം പിടികൂടാൻ പ്രത്യേക പരിശോധന നടത്തുമെന്ന് മോട്ടോർ വാഹന വകുപ്പ്​ ഹൈകോടതിയിൽ

കൊച്ചി: വാഹനങ്ങളിലെ രൂപമാറ്റം പിടികൂടാൻ പ്രത്യേക പരിശോധന നടത്തുമെന്ന്​ മോട്ടോർ വാഹന വകുപ്പ്​ ഹൈകോടതിയിൽ. വ്ലോഗർമാരുടെയും യു ട്യൂബർമാരുടെയും നിയമലംഘന വിഡിയോകൾ യു ട്യൂബിൽനിന്ന് നീക്കണമെന്ന്​ ആവശ്യപ്പെട്ട് യു ട്യൂബ് മോഡറേഷൻ ടീമിന് ഗതാഗത കമീഷണർ കത്തെഴുതിയിട്ടുണ്ട്​. വാഹനങ്ങളിൽ അഭ്യാസ പ്രകടനം നടത്തിയുള്ള ഒട്ടോ ഷോ പരിപാടികൾ കലാലയങ്ങളിൽ പാടില്ലെന്ന്​ നിർദേശം നൽകണമെന്ന്​ പൊതുവിദ്യാഭ്യാസ, ഉന്നത വിദ്യാഭ്യാസ ഡയറക്ടർമാരോട്​ ആവശ്യപ്പെട്ടിട്ടുണ്ടെന്നും സർക്കാർ വ്യക്തമാക്കി.

വ്ലോഗർമാരും യു ട്യൂബർമാരും നടത്തുന്ന ട്രാഫിക് നിയമലംഘനങ്ങൾക്കെതിരായ ഹരജികളാണ്​ കോടതി പരിഗണിച്ചത്​. ഓൺലൈനിൽ അപ്​ലോഡ് ചെയ്ത നിയമലംഘന വിഡിയോകളടക്കം റോഡ്, ഹൈവേ​ ഗതാഗത മന്ത്രാലയം സെക്രട്ടറിയെ അറിയിച്ചിട്ടുണ്ടെന്നും വിശദീകരണത്തിന് സമയം വേണമെന്നും കേന്ദ്രസർക്കാർ അറിയിച്ചു. കാമ്പസുകളിൽ വാഹനങ്ങളുമായുള്ള അഭ്യാസ പ്രകടനങ്ങൾ വേണ്ടെന്ന്​ ​ജസ്റ്റിസ്​ അനിൽ കെ. നരേന്ദ്രൻ, ജസ്റ്റിസ് ഹരിശങ്കർ വി. മേനോൻ എന്നിവരടങ്ങുന്ന ഡിവിഷൻ ബെഞ്ച് വ്യക്തമാക്കി.

എൽ.ഇ.ഡി ലൈറ്റുകളടക്കം സ്ഥാപിച്ച വാഹനങ്ങളിൽ വിനോദ യാത്ര അനുവദിക്കരുതെന്ന്​ നിർദേശിച്ചിട്ടുണ്ട്. ശബരിമലയിലേക്ക്​ പോകുന്ന വാഹനങ്ങളിൽ എൽ.ഇ.ഡി ലൈറ്റുകൾ ഇല്ലെന്ന് ഉറപ്പാക്കാനായി പരിശോധന നടത്തിയതായും വ്യക്തമാക്കി. തുടർന്ന്​ ഇക്കാര്യങ്ങൾ വിശദീകരിച്ച്​ സത്യവാങ്​മൂലം നൽകാൻ കോടതി ഗതാഗത കമീഷണർക്ക്​ നിർദേശം നൽകി.

ഇരുചക്ര വാഹന ഉടമകൾ അതിസുരക്ഷാ നമ്പർ പ്ലേറ്റുകളിൽ മാറ്റം വരുത്തുന്നത്​ തടയാൻ എന്ത്​ നടപടിയാണ്​ സ്വീകരിക്കാനാവുക എന്ന്​ അറിയിക്കാൻ കോടതി നിർദേശിച്ചു. കാബിനിലിരുന്ന്​ ഡ്രൈവർമാർ വിഡിയോ എടുക്കുന്നത്​ അനുവദിക്കാനാവില്ലെന്നും കോടതി വ്യക്തമാക്കി. ഹരജി വീണ്ടും ജൂൺ 25ന്​ പരിഗണിക്കും.