അവയവമാറ്റത്തിന് പ്രത്യേക വിഭാഗം സ്ഥാപിക്കും -മന്ത്രി വീണ ജോര്ജ്
text_fieldsതിരുവനന്തപുരം: തിരുവനന്തപുരം മെഡിക്കല് കോളജില് അവയവമാറ്റ ശസ്ത്രക്രിയക്ക് പ്രത്യേക വിഭാഗം സ്ഥാപിക്കുമെന്ന് മന്ത്രി വീണ ജോര്ജ്. തിരുവനന്തപുരം, കോഴിക്കോട് മെഡിക്കല് കോളജുകളില്കൂടി കരള് മാറ്റിവെക്കല് ശസ്ത്രക്രിയ നടത്താനായി സജ്ജമാക്കുമെന്നും മന്ത്രി വ്യക്തമാക്കി.
പരിശീലനത്തിന് മുന്നോടിയായി തിരുവനന്തപുരം മെഡിക്കല് കോളജിലെ കരൾ മാറ്റിവെക്കൽ സംഘങ്ങളുമായി നടത്തിയ ആശയവിനിമയത്തിലാണ് മന്ത്രി ഇക്കാര്യം വ്യക്തമാക്കിയത്. സംസ്ഥാനത്ത് അവയവം മാറ്റിവെക്കാനായി കാത്തിരിക്കുന്നവര് ധാരാളമുണ്ട്. അവയവം മാറ്റിവെക്കല് ശസ്ത്രക്രിയക്ക് വിധേയനാകുന്ന വ്യക്തിയെ സംബന്ധിച്ച് വലിയ സാമ്പത്തിക പ്രതിസന്ധിയാണ് ഉണ്ടാക്കുന്നത്.
ഇതിനൊരു പരിഹാരം കാണാനാണ് സര്ക്കാര് മേഖലയില് കരള് മാറ്റിവെക്കല് ശസ്ത്രക്രിയ യാഥാർഥ്യമാക്കുന്നത്.
അവയവം മാറ്റിവെക്കല് പ്രക്രിയ സുതാര്യമാക്കാനാണ് സര്ക്കാര് ശ്രമിക്കുന്നതെന്നും മന്ത്രി പറഞ്ഞു. ഫെബ്രുവരി 24ന് മന്ത്രിയുടെ നേതൃത്വത്തില് നടന്ന ചര്ച്ചയില് അടിയന്തരമായി ലിവര് ട്രാൻസ്പ്ലാന്റ് ടീം അംഗങ്ങള്ക്കുള്ള പരിശീലനം നല്കണമെന്ന് നിര്ദേശിച്ചിരുന്നു.
ചൊവ്വാഴ്ച മുതല് പരിശീലനം ആരംഭിക്കുകയാണ്. അതിന് മുന്നോടിയായിട്ടാണ് മന്ത്രി നേരിട്ട് ആശയ വിനിമയം നടത്തിയത്. വിവിധ വിഭാഗങ്ങളിലെ ഡോക്ടര്മാര്, നഴ്സുമാര്, ടെക്നീഷ്യന്മാര് തുടങ്ങി 50 ഓളം പേര് പങ്കെടുത്തു. മെഡിക്കല് വിദ്യാഭ്യാസ വകുപ്പ് ഡയറക്ടര് ഡോ. എ. റംലാബീവി, മെഡിക്കല് കോളജ് പ്രിന്സിപ്പാള് ഡോ. സാറ വര്ഗീസ്, വൈസ് പ്രിന്സിപ്പല് ഡോ. രാജ്മോഹന്, മെഡിക്കല് കോളജ് ആശുപത്രി സൂപ്രണ്ട് ഡോ. എ. നിസാറുദ്ദീന്, ഡെപ്യൂട്ടി സൂപ്രണ്ട് ഡോ. സുനില്കുമാര്, സര്ജിക്കല് ഗ്യാസ്ട്രോ വിഭാഗം മേധാവി ഡോ. രമേഷ് രാജന്, മെഡിക്കല് ഗ്യാസ്ട്രോ വിഭാഗം മേധാവി ഡോ. കൃഷ്ണദാസ്, കെ സോട്ടോ എക്സി. ഡയറക്ടര് ഡോ. നോബിള് ഗ്രേഷ്യസ്, അനസ്തീഷ്യ വിഭാഗം മേധാവി ഡോ. ലിനറ്റ്, ഡോ. അനില് സത്യദാസ് എന്നിവര് പങ്കെടുത്തു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.