പൊലീസിലെ സ്​പോർട്​സ്​ ക്വാട്ട നിയമനം: അനസിന്​ ജോലി നിഷേധിച്ചത്​ 31 വയസ്സിന്‍റെ പേരിൽ, ഇപ്പോൾ 39കാരനും നിയമനം

തിരുവനന്തപുരം: ​പൊലീസിലെ സ്​പോട്​സ്​ ക്വാട്ട നിയമന വിവാദത്തിനിടെ ദേശീയ ഫുട്​ബാൾ താരം അനസ്​ എടത്തൊടി​കക്ക്​ നിയമനം നിഷേധിച്ച്​ ആഭ്യന്തരവകുപ്പ്​ നൽകിയ മറുപടി വീണ്ടും ചർച്ചയാകുന്നു. നിലവിൽ കായികരംഗത്ത് സജീവമായി നിൽക്കുന്നവരെയും താരതമ്യേന 25 വയസ്സിൽ കുറവുള്ളവരെയുമാണ്​ കേരള പൊലീസിൽ സ്പോർട്സ് ക്വാട്ടയിൽ ജോലിയിൽ പ്രവേശിപ്പിക്കുന്നതെന്നും അനസിന്​ 31 വയസ്സ് പൂർത്തിയായതിനാൽ ഹവിൽദാർ തസ്തികയിലേക്ക്​ പോലും​ നിയമനം നൽകാനാവില്ല എന്നുമായിരുന്നു 2020 ഡിസംബർ 27ന്​ ആഭ്യന്തരവകുപ്പ്​ നൽകിയ മറുപടി. അതേസമയം, ഇപ്പോൾ 39 വയസ്സായ 1986ൽ ജനിച്ച ചിത്തരേഷ് നടേശന്‍റെ നിയമനത്തിന്​ ഈ മാനദണ്ഡം ബാധകമല്ല.​

സ്​പോട്​സ്​ ക്വാട്ട നിയമനത്തിനുള്ള കായിക ഇനമായി അംഗീകരിക്കാത്ത ബോഡി ബിൽഡിങ്​ താരങ്ങൾക്ക്​ ചട്ടം മറികടന്ന്​ പൊലീസിൽ ഗസറ്റഡ്​ റാങ്കിൽ നേരിട്ട്​ നിയമനം നൽകാനുള്ള സർക്കാർ തീരുമാനത്തിനിടെയാണ്​ രാജ്യത്തിന്​ വേണ്ടി ഫുട്​​ബാൾ കളിച്ച അനസ്​, റിനോ ആന്‍റോ, ഹാൻഡ്​ബാൾ താരം എസ്​. ശിവപ്രസാദ്​, ​ചെസിലെ എസ്​.എൽ. നാരായൺ തുടങ്ങി നിരവധി താരങ്ങളെ​ തഴയുന്നത്​.

2020ലെ ആഭ്യന്തരവകുപ്പ്​ ഉത്തരവ്​ പ്രകാരം ഷൂട്ടിങ്​ കൂടി ഉൾപ്പെടുത്തി 12 കായിക ഇനങ്ങളിൽ നിന്നുള്ളവർക്ക്​ സായുധസേനയിൽ ഹവിൽദാർ തസ്തികയിൽ നിയമനം നൽകാമെന്ന്​ നിഷ്​കർശിക്കുന്നുണ്ട്​​. ഈ ചട്ടവും മറികടന്നാണ്​ രണ്ടു​ പേരെ ഗസറ്റഡ്​ റാങ്കായ ഇൻസ്​പെക്ടർ തസ്തികയിലേക്ക്​ നേരിട്ട്​ നിയമിക്കുന്നത്​.

പുതിയതാരങ്ങളുടെ തൊഴിലവസരം നഷ്ടമാകുമെന്ന്​ കരുതിയാണ്​ നിയമനടപടിക്ക്​ പോകാത്തത് -അനസ്​ എടത്തൊടിക

ഈ വിഷയുമായി ബന്ധപ്പെട്ട എന്‍റെ വാക്കുകളെല്ലാം തെറ്റിദ്ധരിക്കപ്പെടാറാണ്​ പതിവ്​. പിന്നീട്​ ഞാനായിട്ട്​ ജോലി അവസരം തേടി പോയിട്ടില്ല. ഇത്​ എന്‍റെ മാത്രം പ്രശ്നമായല്ല ഉന്നയിക്കുന്നത്​. സർക്കാർ അംഗീകരിക്കേണ്ടവരെ അംഗീകരിക്കണം. ഇപ്പോൾ വിവാദമായ വ്യക്​തികൾക്ക്​ ജോലികിട്ടുന്നതിൽ എനിക്ക്​​ എതിർപ്പില്ല. എന്നാൽ, അവർക്ക്​ ജോലികിട്ടുന്നതിനോടാണ്​ എന്‍റെ എതിർപ്പെന്നാണ് എല്ലാവരും കരുതുന്നത്​​. ആ കായിക താരങ്ങൾക്ക്​ എതിരാണ്​ ഞാനെന്ന രീതിയിലാണ്​ എന്‍റെ പ്രതികരണങ്ങൾ പലപ്പോഴും വാർത്തയാകുന്നത്​.

സാമ്പത്തിക നില നോക്കിയല്ല സച്ചിനും ധോണിക്കും മോഹൻലാലിനുമെല്ലാം സൈനിക റാങ്ക്​ ​കൊടുത്തത്​. അതവർക്ക്​ സർക്കാർ നൽകുന്ന അംഗീകാരമാണ്​ എന്നുപോലും മനസ്സിലാകാത്ത അധികാരികളാണ്​. ജോലി കൊടുക്കുന്നതും കൊടുക്കാതിരിക്കുന്നതും സർക്കാർ തീരുമാനമാണ്​. പക്ഷെ, മാനദണ്ഡങ്ങൾ ഉള്ളവർക്കും ​അംഗീകാരമായി ജോലി നൽകണമെന്നാണ്​ എന്‍റെ അഭിപ്രായം. ജോലി കിട്ടിയവർക്ക്​ അത്​ ലഭിച്ചതിനോട്​ എതിർപ്പില്ല എന്ന്​ ആവർത്തിക്കുന്നു.

ഇതെന്‍റെ മാ​ത്രം കാര്യമല്ല, ദേശീയ താരം​ ഹവിൽദാർ തസ്തികക്ക്​ പോലും യോഗ്യനല്ല എന്ന്​ പറയുന്നതിലെന്താണ്​ അർഥം​. 150ഓളം പേർക്കുള്ള​ ​തൊഴിലവസരം നഷ്ടമാകുമെന്ന്​ കരുതിയാണ്​ നിയമനടപടിക്ക്​ പോകാത്തത്​. കോടതി സ്​റ്റേ ഉത്തരവിട്ടാൽ സർക്കാർ സ്​പോട്​സ്​ ക്വാട്ട നിയമനം നിർത്തിയേക്കും.

അതോടെ, മറ്റ്​ കായികതാരങ്ങളും അവരുടെ കുടുംബങ്ങളും എന്നെ ശത്രുവായി കാണും. ജോലിയെങ്കിലും കിട്ടിയാൽ മതിയെന്ന്​ ചിന്തിക്കുന്ന നിരവധി പാവപ്പെട്ട മാതാപിതാക്കളുണ്ട്​. രാഷ്ട്രീയക്കാർക്കല്ല കായികതാരങ്ങൾക്ക്​ മാത്രമായിരിക്കും അപ്പോഴും നഷ്ടം. അതുകൊണ്ട്​ ഒന്നിനും പോകാനില്ല. പല രാഷ്​ട്രീയക്കാരും കേസുമായി മുന്നോട്ട്​ പോകണമെന്ന്​ പറഞ്ഞിരുന്നു. അപ്പേഴെല്ലാം പുതിയ കുട്ടികളുടെ അവസരം നഷ്ടപ്പെടുത്തരുതെന്നാണ്​ വിചാരിച്ചത്​- അനസ്​ എടത്തൊടിക ‘മാധ്യമ’ത്തോട്​ പറഞ്ഞു.