വരാപ്പുഴ കസ്​റ്റഡി മരണം: പ്രതി എസ്​.ഐ ദീപക്കിന് ജാമ്യം

കൊച്ചി: വരാപ്പുഴ കസ്​റ്റഡി മരണ കേസിലെ പ്രതിയായ എസ്​.​െഎ ദീപക്കിന് ഹൈകോടതി ഉപാധികളോടെ ജാമ്യം അനുവദിച്ചു. ഒരു ലക്ഷം രൂപ ജാമ്യതുക കെട്ടിവെക്കണം. എല്ലാ തിങ്കളാഴ്ചയും അന്വേഷണ ഉദ്യോഗസ്ഥന് മുന്നിൽ ഹാജരാകണം. എറണാകുളം വിചാരണ കോടതിയുടെ പരിധിയിൽ പ്രവേശിക്കരുത് എന്നീ ഉപാധികളോടെയാണ് ജാമ്യം അനുവദിച്ചത്.

ശ്രീജിത്തിനെ മർദിച്ചതിലും മരണത്തിലും തനിക്ക് പങ്കില്ലെന്ന്​ വ്യക്​തമാക്കി ദീപക്ക് നൽകിയ ഹരജിയിൽ പ്രോസിക്യുഷ​ന്‍റെ വിശദീകരണം കൂടി കേട്ട ശേഷമാണ്​ വിധി പറഞത്. 

ഏപ്രിൽ 24 മുതൽ ഹരജിക്കാരൻ റിമാൻഡിൽ കഴിയുകയാണ്. എസ്​.പി അടക്കം മേലുദ്യോഗസ്​ഥ​െര രക്ഷപ്പെടുത്താൻ പ്രോസിക്യൂഷൻ തന്നെ ബലിയാടാക്കുകയാണെന്നും എസ്.ഐ പറഞ്ഞു. എന്നാൽ, ശ്രീജിത്ത് ഉൾപ്പെടെയുള്ള പ്രതികളെ ദീപക്ക് മർദിച്ചതായി കൂടെ കസ്റ്റഡിയിലുണ്ടായിരുന്നവരടക്കം എട്ട് പേർ മൊഴി നൽകിയിട്ടുണ്ടെന്ന് പ്രോസിക്യൂഷൻ വ്യക്തമാക്കി. 

തുടർന്ന്​ സാക്ഷികൾ ഇത്​ സംബന്ധിച്ച്​ നൽകിയ 164 പ്രകാരമുള്ള മൊഴി കോടതിയിൽ ഹാജരാക്കി. തെളിവുകളുടെ അടിസ്ഥാനത്തിലാണ്​ ദീപകിനെതിരെ കേസെടുത്തിട്ടുള്ളതെന്നും ആരേയും ബലിയാടാക്കിയിട്ടില്ലെന്നും പ്രോസിക്യൂഷൻ പറഞ്ഞു.