കോടതിയിൽ ഹാജരാക്കാൻ കൊണ്ടുവന്ന ശ്രീലങ്കൻ സ്വദേശി രക്ഷപ്പെട്ടു

തൃശൂർ: വിയ്യൂർ ജയിലിൽനിന്ന്​ അയ്യന്തോളിലെ കോടതിയിൽ ഹാജരാക്കാൻ കൊണ്ടുവന്ന ശ്രീലങ്കൻ സ്വദേശി പൊലീസിനെ കബളിപ്പിച്ച്​ രക്ഷപ്പെട്ടു. കിഷാന്ത്​ റൂബൻ പെരേര (അജിത് കിഷാന്ത് -52) ആണ്​ രക്ഷപ്പെട്ടത്​. ബുധനാഴ്ച ഉച്ചയോടെയാണ്​ സംഭവം.

മയക്കുമരുന്ന്​ കേസിൽ കൊച്ചിയിൽ വെച്ച്​ പിടിയിലായി അവിടെ ജയിലിൽ കഴിഞ്ഞിരുന്ന ഇയാളെ ക്രിമിനൽ പശ്ചാത്തലം പരിഗണിച്ച്​ വിയ്യൂർ ജയിലിലേക്ക്​ മാറ്റിയിരുന്നു. സെല്ലിൽ മൊബൈൽ ഫോൺ ഉപയോഗം പിടികൂടിയ കേസിന്‍റെ ഭാഗമായാണ്​ കോടതിയിൽ ഹാജരാക്കാൻ കൊണ്ടുവന്നത്​. അവിടെ​ വെച്ച്​ മിന്നൽ വേഗത്തിൽ ഇയാൾ രക്ഷപ്പെടുകയായിരുന്നുവെന്ന്​ പൊലീസ്​ പറയുന്നു.

‘ഇന്ത്യൻ പാർലമെന്‍റ്​’ എന്ന്​ എഴുതിയ വെളുത്ത ടീ ഷർട്ട്​ ധരിച്ച ദൃഢഗാത്രനാണ്​ പ്രതിയെന്ന് പൊലീസ് പറയുന്നു. തൃശൂർ വെസ്റ്റ്​ പൊലീസ്​ അടക്കം നഗരത്തിൽ വിവിധയിടങ്ങളിലും ബസ്​ സ്റ്റാന്‍റുകൾ, റെയിൽവേ സ്​റ്റേഷൻ എന്നിടിങ്ങളിലും ഇയാൾക്കായി തിരച്ചിൽ ശക്തമാക്കിയിട്ടുണ്ട്​. മറ്റ്​ ജില്ലകളിലെ പൊലീസ്​ സ്​റ്റേഷനുകളിലും അതിർത്തിയിലും ജാഗ്രത നിർദേശം നൽകി​.