മലയാളമറിയാത്ത പ്രതിയുടെ മൊഴി ദ്വിഭാഷി പരിഭാഷപ്പെടുത്തിയത് തെളിവായി സ്വീകരിക്കാനാവില്ലെന്ന്

കൊച്ചി: മലയാളമറിയാത്ത പ്രതിയുടെ മൊഴി ദ്വിഭാഷിയുടെ സഹായത്തോടെ മലയാളത്തിലേക്ക് പരിഭാഷപ്പെടുത്തി രേഖപ്പെടുത്തിയത് തെളിവായി സ്വീകരിക്കാനാവില്ലെന്ന് ഹൈകോടതി. പശ്ചിമബംഗാൾ സ്വദേശി പ്രദീപ് റോയി എന്നയാളെ കൊലപ്പെടുത്തിയ കേസിലെ പ്രതി സനത് റോയിക്ക് തൃശൂർ അഡീ. സെഷൻസ് കോടതി വിധിച്ച ജീവപര്യന്തം തടവുശിക്ഷ റദ്ദാക്കിയാണ്​ ജസ്റ്റിസ് പി.ബി. സുരേഷ് കുമാർ, ജസ്റ്റിസ് പി.ജി. അജിത് കുമാർ എന്നിവരടങ്ങുന്ന ഡിവിഷൻ ബെഞ്ചിന്‍റെ നിരീക്ഷണം. വിചാരണ വേളയിൽ ദ്വിഭാഷിയെ വിസ്തരിച്ചിട്ടില്ലെന്നത്​ കൂടി കണക്കിലെടുത്താണ്​ ഉത്തരവ്​.

കുന്നംകുളം ആലിൻതൈയിൽ ഹോളോബ്രിക്‌സ്​ സ്ഥാപനത്തിൽ ജോലിക്കാരനായിരുന്ന പ്രദീപ് 2012 മാർച്ച് 11നാണ് കൊല്ലപ്പെട്ടത്. പ്രദീപിന്റെ പരിചയക്കാരനായ സനത് റോയി പണം തട്ടിയെടുക്കാൻ കൊല നടത്തിയെന്നാണ് പൊലീസിന്റെ കണ്ടെത്തൽ. പ്രദീപിന്റെ പഴ്‌സ്, മൊബൈൽ ഫോൺ, ​​കൊല നടത്താനുപയോഗിച്ച ആയുധം തുടങ്ങിയവ ഇയാളുടെ പക്കൽനിന്ന് കണ്ടെടുത്തിരുന്നു. ചോദ്യം ചെയ്യലിൽ പ്രദീപിനെ താൻ കൊലപ്പെടുത്തിയതാണെന്ന് സനത് മൊഴിയും നൽകി. ബംഗാളി ഭാഷയറിയാവുന്ന ഒരു സിവിൽ പൊലീസ് ഉദ്യോഗസ്ഥന്റെ സഹായത്തോടെയാണ് ചോദ്യം ചെയ്തത്. സനത് റോയി നൽകിയ മൊഴി ഈ ഉദ്യോഗസ്ഥനാണ് മലയാളത്തിലേക്ക് പരിഭാഷപ്പെടുത്തിയത്.

ദൃക്‌സാക്ഷികളില്ലാത്ത കേസിൽ ഈ മൊഴിയടക്കം കണക്കിലെടുത്താണ് തൃശൂർ അഡീ. സെഷൻസ് കോടതി 2018ൽ ശിക്ഷ വിധിച്ചത്. ഇതിനെതിരെ പ്രതി നൽകിയ അപ്പീൽ ഹരജിയാണ്​ കോടതി പരിഗണിച്ചത്​. പ്രതിയുടെ മൊഴി പരിഭാഷപ്പെടുത്തി മലയാളത്തിൽ രേഖപ്പെടുത്തിയത് തെളിവുനിയമപ്രകാരം സ്വീകാര്യമല്ലെന്ന ഹരജിയിലെ വാദം അംഗീകരിച്ചാണ് ശിക്ഷ റദ്ദാക്കിയത്​​.