റെഡ്​സോൺ ജില്ലകളിൽനിന്ന്​ വരുന്നവർക്കും നിർബന്ധിത ക്വാറൻറീൻ

തിരുവനന്തപുരം: ഇതര സംസ്​ഥാനങ്ങളിൽ നിന്നും  കേരളത്തിലെത്താൻ 1,80,040 പേർ​ നോർക്ക വഴി രജിസ്​റ്റർ ചെയ്​തതായി മുഖ്യമന്ത്രി പിണറായി വിജയൻ അറിയിച്ചു​. ഇതിൽ 25,410 പേർക്ക്​ പാസ്​ നൽകി. ഇവരിൽ 3363 പേർ ​തിരിച്ചെത്തി. 

രാജ്യത്ത്​ രോഗബാധ തീവ്രമായുള്ള പത്തു ജില്ലകളുണ്ട്​. അത്തരം ജില്ലകളിൽനിന്നോ നഗരങ്ങളിൽനിന്നോ വരുന്നവരുടെ കാര്യത്തിൽ പ്ര​ത്യേകം ശ്രദ്ധയും ജാഗ്രതയും വേണ​മെന്ന്​ തീരുമാനിച്ചു. മറ്റു സംസ്​ഥാനങ്ങളിലെ ​റെഡ്​സോൺ ജില്ലകളിൽനിന്ന്​ വരുന്നവർ ഒരാഴ്​ച നിർബന്ധമായും സർക്കാർ ഒരുക്കുന്ന ക്വാറൻറീനിൽ കഴിയണം. 

നോർക്കയിൽ രജിസ്​റ്റർ ചെയ്​ത്​ അതിർത്തികളിൽ എത്തുന്നവർ കുടുങ്ങി കിടക്കാൻ കഴിയില്ല. രണ്ടിടത്തെയും പാസ്​ വേണം. എവിടെനിന്നാണോ പുറപ്പെടുന്നത്​ അവി​ടത്തെ പാസും എവിടെയാണോ എത്തേണ്ടത്​ അവിടത്തെ പാസും ആവശ്യമാണ്​. നേരത്തേ സമയം നിശ്ചയിച്ച്​ നൽകുന്നുണ്ട്​. അതിർ​ത്തിയിലെത്തിയാൽ പെട്ടന്ന്​ പരിശോധന പൂർത്തിയാക്കി യാത്ര തുടരാൻ കഴിയണം. കാലതാമസം ഒഴിവാക്കണം. അതിർത്തികളിൽനിശ്ചയിക്കപ്പെട്ട ഉദ്യോഗസ്​ഥർ മാത്രമേ പാടുള്ളൂ. ഒരു സ്​ഥലത്തും സ്വീകരണ പരിപാടി അനുവദിക്കില്ല. ഉദ്യോഗസ്​ഥരല്ലാത്ത ആരും അവിടെ ഉണ്ടാകേണ്ടതില്ലെന്നും മുഖ്യമന്ത്രി പറഞ്ഞു. 

മറ്റു സംസ്​ഥാനങ്ങളിൽ നിന്നുള്ള കേരളീയരെ തിരിച്ചെത്തിക്കാൻ ട്രെയിൻ ഏർപ്പാടാക്കുന്നതിനുള്ള ശ്രമം തുടരുകയാണ്​. അതിൽ പഞ്ചാബ്​, ഡൽഹി, ഹരിയാന തുടങ്ങിയ സംസ്​ഥാനങ്ങളിൽ കഴ​ിയുന്ന വിദ്യാർഥികളുണ്ട്​. അത്തരം വിദ്യാർഥികളെ ​ഡൽഹി കേന്ദ്രീകരിച്ച്​ ട്രെയിൻ വഴി തിരിച്ചുകൊണ്ടുവരാനുള്ള ശ്രമം ആരംഭിച്ചു. 

മറ്റു സംസ്​ഥാനങ്ങളിൽനിന്ന്​ വരുന്നവർക്ക്​ വാഹനം ലഭിക്കുന്നതിനുള്ള പ്രയാസമുണ്ട്​. അവർ ചിലവു വഹിക്കാൻ തയാറാണെങ്കിലും വാഹനം ലഭ്യമാകുന്നില്ല. ഇവർക്ക്​ പ്രത്യേക സംവിധാനം ഒരുക്കാൻ ആലോചിക്കുന്നതായും മുഖ്യമന്ത്രി പറഞ്ഞു.