വിദ്യാർഥിയെ കാറിടിച്ച്​ കൊലപ്പെടുത്തിയ കേസ്​: പ്രതി ജാമ്യഹരജി നൽകി, പിൻവലിച്ചു

കൊച്ചി: പത്താംക്ലാസ് വിദ്യാർഥിയെ കാറിടിച്ച് കൊലപ്പെടുത്തിയ കേസിലെ പ്രതി ഹൈകോടതിയിൽ ജാമ്യഹരജി നൽകിയെങ്കിലും പിൻവലിച്ചു. ഗുരുതര ആരോപണമാണ് ഇയാൾക്കെതിരെയുള്ളതെന്നും അന്വേഷണം കഴിയട്ടെയെന്നും വ്യക്തമാക്കിയ ജസ്റ്റിസ് പി. ഗോപിനാഥ്, ജാമ്യഹരജി തള്ളുമെന്ന്​ സൂചനയും നൽകി. ഇതിനുപിന്നാലെ പ്രതിയായ കാട്ടാക്കട സ്വദേശി പ്രിയരഞ്ജന്‍റെ അഭിഭാഷകൻ ഹരജി പിൻവലിക്കുകയായിരുന്നു.

പ്രോസിക്യൂഷൻ നേരത്തേ കോടതിയിൽ കേസ് ഡയറിയും സി.സി ടി.വി ദശ്യങ്ങളും ഹാജരാക്കിയിരുന്നു. ഇതടക്കം പരിശോധിച്ചാണ്​ ജാമ്യഹരജി തള്ളുമെന്ന് കോടതി സൂചന നൽകിയത്​. സൈക്കിളിൽ കയറാൻ ശ്രമിക്കുന്നതിനിടെ ആദിശേഖർ എന്ന വിദ്യാർഥിയെ മുൻവൈരാഗ്യത്തിന്‍റെ പേരിൽ ​പ്രതി പിന്നിൽനിന്ന് കാറിടിപ്പിച്ച്​ കൊലപ്പെടുത്തിയെന്നാണ്​ കേസ്​.

ആഗസ്റ്റ് 30നാണ്​ സംഭവം. ക്ഷേത്ര മതിലിനരികിൽ പ്രതി മൂത്രമൊഴിച്ചത് ആദിശേഖർ ചോദ്യംചെയ്തതിൽ പ്രതിക്ക്​ വിരോധമുണ്ടായിരുന്നെന്ന്​ കുട്ടിയുടെ രക്ഷിതാക്കൾ മൊഴി നൽകിയിരുന്നു. ഇത്​ കണക്കിലെടുത്തും സി.സി ടി.വി ദൃശ്യങ്ങളടക്കം പരിശോധിച്ചുമാണ് പ്രതിയെ അറസ്റ്റ് ചെയ്തത്​.

വിദേശത്ത് ജോലിചെയ്യുന്ന ഭാര്യയുമായി ഫോണിൽ സംസാരിച്ച്​ കാറെടുത്തപ്പോൾ വിദ്യാർഥിയു​ടെ സൈക്കിളിൽ ഇടിക്കുകയായിരുന്നെന്നാണ് പ്രതിയുടെ വാദം. പുതിയ വൈദ്യുതി കാറായിരുന്നതിന്‍റെ പരിചയക്കുറവും കാരണമായി. തനിക്കെതിരെ കൊലപാതകക്കുറ്റം ചുമത്താനാകാത്ത സാഹചര്യത്തിൽ സെപ്റ്റംബർ 13ന് അറസ്റ്റിലായ തനിക്ക്​ ജാമ്യം അനുവദിക്കണമെന്നായിരുന്നു ആവശ്യം.