വിദ്യാർഥികളുടെ​ യാത്രാ നിരക്കിളവ്​ തുടരുമെന്ന്​ മന്ത്രി

തിരുവനന്തപുരം: വിദ്യാർഥികളുടെ യാത്ര നിരക്കിൽ മാറ്റമില്ലെന്നും എല്ലാ സ്വകാര്യ ബസുകളിലും 2020 ജൂലൈയിൽ പുറപ്പെടുവിച്ച ഉത്തരവിൽ പറയുന്ന പ്രകാരമുള്ള കൺസഷൻ അനുവദിക്കണമെന്നും ഗതാഗതമന്ത്രിയുടെ നിർദേശം. ജൂലൈയിലെ ഉത്തരവനുസരിച്ച് 2.5 കിലോമീറ്ററിന്​ ഒരു രൂപയും 7.5 കി. മീ വരെ രണ്ടു രൂപയും 12.5 കീ. മീ വരെ മൂന്നു രൂപയുമാണ്​ നിരക്ക്​.

സർക്കാർ തുറന്നുപ്രവർത്തിക്കാൻ അനുവദിച്ച 10, 12, ഡിഗ്രി അവസാന വർഷം, പോസ്​റ്റ്​ ഗ്രാജ്വേറ്റ്, പ്രഫഷനൽ കോളജ്, സാങ്കേതിക പരിശീലന വിഭാഗം വിദ്യാർഥികൾക്കാണ് ഇപ്പോൾ കൺസഷൻ ടിക്കറ്റ് ലഭിക്കുന്നത്. വിദ്യാർഥികൾ അവരുടെ വിദ്യാലയങ്ങൾ നൽകുന്ന ഐ.ഡി കൈവശം സൂക്ഷിക്കണം.

സ്വകാര്യ ബസുകൾ വിദ്യാർഥികൾക്ക് കൺസഷൻ ടിക്കറ്റ് നിഷേധിക്കുന്നതായി വിവിധയിടങ്ങളിൽനിന്ന് കഴിഞ്ഞ ദിവസം തന്നെ പരാതികൾ ഉയർന്നത് സർക്കാറി​െൻറ ശ്രദ്ധയിൽപെട്ടിരുന്നു. തിങ്കളാഴ്ച മുതൽ വിദ്യാർഥികൾക്ക് അർഹതപ്പെട്ട കൺസഷൻ ടിക്കറ്റ് ലഭിക്കുന്നെന്ന് ഉറപ്പുവരുത്താൻ വേണ്ട നടപടി സ്വീകരിക്കാൻ ഗതാഗത കമീഷണർക്ക് മന്ത്രി നിർദേശം നൽകി.