പൗരത്വപ്ര​ക്ഷോഭം: വട്ടിയൂർകാവ്​ മഹല്ല്​ ഭാരവാഹികൾക്ക്​ സമൻസ്​

തിരുവനന്തപുരം: പൗരത്വപ്രക്ഷോഭത്തിന്‍റെ പേരിൽ വട്ടിയൂർകാവ്​ മുസ്​ലിം ജമാഅത്ത്​ ഭാരവാഹികളടക്കം അഞ്ചു​പേർക്ക്​ കോടതിയിൽ ഹാജരാകാൻ സമൻസ്​. ബുധനാഴ്ച നെടുമങ്ങാട്​ കോടതിയിലാണ്​ ഹാജരാകേണ്ടത്​. സ്ഥലം എം.എൽ.എയും ഇടതുപക്ഷാംഗവുമായ വി.കെ. പ്രശാന്ത്​ അടക്കം പ​ങ്കെടുത്ത പ്രതിഷേധത്തിന്​ നേതൃത്വം കൊടുത്തതിനാണ്​ അന്നത്തെ മഹല്ല്​ ഭാരവാഹികൾക്ക്​ സമൻസ്​ ലഭിച്ചത്​. പൗരത്വ പ്രക്ഷോഭ കേസുകൾ പിൻവലിക്കുമെന്ന്​ മുഖ്യമന്ത്രി പ്രഖ്യാപിച്ചിരുന്നെ​ങ്കിലും ഈ കേസ്​ പിൻവലിച്ചിരുന്നില്ല.

രാജ്യമാകെ പൗരത്വ പ്രക്ഷോഭം കത്തിയാളുന്നതിനിടെ 2020 ജനുവരി 19 നായിരുന്നു​ വട്ടിയൂർകാവ്​ ജമാഅത്തിന്‍റെ നേതൃത്വത്തിൽ പ്രതിഷേധ പരിപാടി. നെട്ടയത്തുനിന്ന്​ വട്ടിയൂർകാവിലേക്ക്​ മാർച്ചും തുടർന്ന്​ വട്ടിയൂർകാവിൽ ​പ്രതിഷേധ സംഗമവുമായിരുന്നു നടന്നത്​. പൊതുനിരത്തിൽ ഗതാഗത തടസ്സം സൃഷ്ടിക്കും വിധത്തിൽ ജാഥയോ പ്രകടനമോ നടത്താൻ പാടി​ല്ലെന്ന ഹൈകോടതി ഉത്തരവ്​ ലംഘിച്ചു, നെട്ടയം ജങ്​ഷനിൽ അന്യായമായി സംഘം ചേർന്നു, കാൽനടയാത്രക്കാർക്കും വാഹനയാത്രക്കാർക്കും തടസ്സം സൃഷ്ടിച്ച്​ പ്രകടനം നടത്തി എന്നീ കുറ്റങ്ങളാണ്​ ഭാരവാഹികൾക്കു​മേൽ ചുമത്തിയത്​. അന്ന​ത്തെ മഹല്ല്​ പ്രസിഡന്‍റ്​, വൈസ്​ പ്രസിഡന്‍റ്​, ജനറൽ സെക്രട്ടറി, സെക്രട്ടറി, കമ്മിറ്റിയിലെ ഒരംഗം എന്നിവർക്കാണ്​ സമൻസ്​ ലഭിച്ചത്​. പൊലീസ്​ കേസെടുത്ത കാര്യം ഭാരവാഹികൾ അറിഞ്ഞിരുന്നില്ല.

കോടതിയിൽനിന്ന്​ സമൻസെത്തിയ കാര്യം പൊലീസ്​ സ്​റ്റേഷനിൽനിന്ന്​ വിളിച്ചറിയിക്കുമ്പോഴാണ്​ ഇക്കാര്യം മഹല്ല്​ ഭാരവാഹികളും അറിയുന്നത്​.

ഗുരുതര ക്രിമിനൽ സ്വഭാവമില്ലാത്ത കേസുകൾ പിൻവലിക്കുമെന്ന്​ 2021 ഫെബ്രുവരിയിലാണ്​ സർക്കാർ തീരുമാനിച്ചത്​. എന്നാൽ, ഗതാഗത തടസ്സം സൃഷ്ടിച്ചെന്ന നിസ്സാര കേസുകളിൽപോലും ഇതാണ്​ സ്ഥിതി. പൗരത്വ പ്രക്ഷോഭത്തിലെ കേസുകൾ പിൻവലിക്കാൻ തീരുമാനിച്ചിട്ടുണ്ടെങ്കിലും നടപടിക്രമങ്ങൾ അനുസരിച്ചേ നടപടി കൈക്കൊള്ളാനാകൂവെന്ന് കഴിഞ്ഞദിവസം കെ.എൻ. ബാലഗോപാൽ വ്യക്തമാക്കിയിരുന്നു.

ഏക സിവിൽകോഡ് വിഷയത്തിൽ സമരത്തിനിറങ്ങുന്ന സി.പി.എം, ആത്മാർഥതയുണ്ടെങ്കിൽ ആദ്യം പൗരത്വപ്രക്ഷോഭ കാലത്ത് എടുത്ത കേസുകൾ പിൻവലിക്കണമെന്ന മുസ്​ലിം ലീഗിന്‍റെ പരാമർശത്തോടായിരുന്നു മന്ത്രിയുടെ പ്രതികരണം.

പൗരത്വപ്രക്ഷോഭ കേസുകളുടെ വിശദാംശങ്ങൾ 2022 ഡിസംബറിൽ നിയമസഭയിൽ സംസ്ഥാന സർക്കാർ വിശദീകരിച്ചിരുന്നു. ഇതു​ പ്രകാരം സംസ്ഥാനത്താകെ രജിസ്റ്റർ ചെയ്ത 835 കേസുകളിൽ 49 കേസുകൾ മാത്രമാണ്​ പിൻവലിച്ചത്​.

159 കേസുകൾ രജിസ്റ്റർ ചെയ്​ത കോഴിക്കോട്​ ഒരെണ്ണം പോലും പിൻവലിച്ചിട്ടില്ല. സംസ്ഥാനത്ത്​ പൗരത്വ പ്രക്ഷോഭവുമായി ബന്ധ​പ്പെട്ട്​ ഏറ്റവും കൂടുതൽ കേസുകൾ രജിസ്റ്റർ ചെയ്​തതും കോഴിക്കോടാണ്​. 39 കേസുള്ള തിരുവനന്തപുരത്ത്​ ഒരെണ്ണം മാ​ത്രം പിൻവലിച്ചത്​.