പ്രചാരണത്തിന്​ സുരേന്ദ്രൻ ഇരുമണ്ഡലങ്ങൾക്കിടയിൽ ഹെലികോപ്​ടറിൽ പറന്നത്​ പത്തിലേറെ തവണ

കോന്നി: മഞ്ചേശ്വരത്തും കോന്നിയിലും മത്സരിച്ച ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ ഇരുമണ്ഡലത്തിലും പ്രചാരണത്തിന്​ ഹെലികോപ്​ടറിൽ പറന്നത്​ പത്തിലേറെ തവണ. കെ. സുരേന്ദ്രനും പരിവാരങ്ങൾക്കും കോന്നിയിൽ ക്യാമ്പ് ചെയ്യാൻ മൂന്ന്​ അപ്പാർട്മെൻറും നിരവധി ലോഡ്​ജുകളും എടുത്തിരുന്നു. ഈ അപ്പാർട്മെൻറിലാണ്​ സാമ്പത്തിക കാര്യങ്ങളടക്കം തെര​െഞ്ഞടുപ്പ്​ പ്രചാരണത്തി​െൻറ എല്ലാ കരുനീക്കങ്ങളും നടന്നത്​.

കോന്നി ആനക്കൂട് റോഡിൽ ജോയൻറ് ആർ.ടി ഓഫിസ് പ്രവർത്തിക്കുന്ന ബി ആൻഡ്​ ബി അപ്പാർട്മെൻറാണ് സുരേന്ദ്രനായി ബി.ജെ.പി ജില്ല പ്രസിഡൻറ് അശോകൻ കുളനട എടുത്തത്. ഇവിടെ മൂന്ന് അപ്പാർട്മെൻറാണ് എടുത്തത്. ഒന്നിൽ കെ. സുരേന്ദ്രനും മകൻ ഹരികൃഷ്ണനും മറ്റൊന്നിൽ ബി.ജെ.പി സംസ്ഥാന സെക്രട്ടറി കോഴിക്കോട് സ്വദേശി രഘുനാഥും മറ്റൊരു അപ്പാർട്മെൻറിൽ കെ. സുരേന്ദ്ര​െൻറ സെക്രട്ടറിയും ഡ്രൈവറുമായിരുന്നു താമസം.

ഒന്നിടവിട്ട ഇടവേളകളിൽ കെ. സുരേന്ദ്രൻ മഞ്ചേശ്വരത്ത് പോകാറുണ്ടെങ്കിലും മകൻ ഹരികൃഷ്ണൻ കോന്നിയിൽതന്നെയായിരുന്നു. അപ്പാർട്മെൻറ് കൂടാതെ തെരഞ്ഞെടുപ്പ് പ്രവർത്തനത്തിന്​ എത്തിയ പ്രവർത്തകർക്കായി​ കോന്നി റോയൽ രാജ്​ ​െറസിഡൻസിയിലെ മുഴുവൻ മുറികളും ഒരുമാസത്തേക്ക് എടുത്തിരുന്നു. ദേശീയനേതാക്കൾ ക്യാമ്പ് ചെയ്തിരുന്നത് കുമ്പഴയിലെ ത്രീ സ്​​റ്റാർ ഹോട്ടലിലായിരുന്നു.

കൊടകര കുഴൽപണ വിവാദവുമായി ബന്ധപ്പെട്ട് കോന്നിയിൽ അന്വേഷണ സംഘമെത്തി തെളിവുകൾ ശേഖരി​െച്ചന്ന വാർത്തകൾ നിഷേധിക്കുകയാണ് അപ്പാർട്മെൻറ് ഉടമകൾ. ഇതുവരെ ഒരു അന്വേഷണസംഘവും ഇവിടെ എത്തിയിട്ടില്ലെന്ന് ഇവർ ഉറപ്പിച്ചുപറയുന്നു.

സുരേന്ദ്ര​െൻറ ഹെലികോപ്​ടർ കോന്നി പ്രമാടം സ്​റ്റേഡിയത്തിൽ ഇറക്കുന്നതിന്​ പ്രമാടം പഞ്ചായത്തിലെ ഇടതുപക്ഷ ഭരണസമിതി അനുമതി നൽകിയിരുന്നില്ല. തുടർന്നാണ്​ പത്തനംതിട്ട കാതോലിക്കേറ്റ്​ കോളജ്​, പെരുനാട്ടിലെ സ്വകാര്യ ഹെലിപാഡ്​ എന്നിവിടങ്ങൾ ഉപയോഗിച്ചത്​.