ക്ലിഫ്​ഹൗസിൽ തോക്കിൽനിന്ന് വെടിപൊട്ടിയ സംഭവം: എസ്​.ഐക്ക്​ സസ്​പെൻഷൻ

തിരുവനന്തപുരം: മുഖ്യമന്ത്രി പിണറായി വിജയന്റെ ഔദ്യോഗിക വസതിയായ ക്ലിഫ്​ഹൗസിലെ സുരക്ഷാ ഉദ്യോഗസ്ഥന്റെ തോക്കിൽനിന്ന് ചൊവ്വാഴ്​ച അബദ്ധത്തിൽ വെടിപൊട്ടിയ സംഭവത്തിൽ എസ്​.ഐക്ക്​ സസ്​പെൻഷൻ. സുരക്ഷ ചുമതലയിലുണ്ടായിരുന്നു റാപിഡ് ആക്‌ഷൻ ഫോഴ്സിലെ എസ്​.​ഐ ഷാഹിൻ റഹ്​മാനെയാണ്​ സസ്​പെൻഡ്​ ചെയ്തത്​. 10​ ദിവസം മുമ്പാണ്​ ഈ ഉദ്യോഗസ്ഥൻ ക്ലിഫ്​ഹൗസിൽ ജോലിക്കെത്തിയത്​. അലക്ഷ്യമായി ആയുധം കൈകാര്യം ചെയ്തുവെന്ന കുറ്റത്തിനാണ്​ നടപടി.

അബദ്ധത്തിൽ സംഭവിച്ചതാണെന്ന്​​ പൊലീസ്​ വൃത്തങ്ങൾ വിശദീകരിച്ചിരുന്നെങ്കിലും സിറ്റി പൊലീസ്​ കമീഷണർ റിപ്പോർട്ട്​ ആവശ്യപ്പെട്ടിരുന്നു. അതിന്‍റെ അടിസ്ഥാനത്തിലായിരുന്നു നടപടി. ഗാർ‌ഡ് റൂമിലാണ് വെടിപൊട്ടിയത്. ആർക്കും പരിക്കില്ല. ചൊവ്വാഴ്ച രാവിലെ ഒമ്പതരയോടെ സഭ സമ്മേളനത്തിൽ പ​ങ്കെടുക്കാൻ മുഖ്യമന്ത്രി നിയമസഭയിലേക്ക് പോയതിന്​ ശേഷമായിരുന്നു സംഭവം.

രാവിലെ ഡ്യൂട്ടി മാറുമ്പോൾ പൊലീസുകാർ ആയുധങ്ങൾ വൃത്തിയാക്കാറുണ്ട്. പൊലീസുകാരൻ തോക്ക് താഴേക്ക് ചൂണ്ടി വൃത്തിയാക്കുകയായിരുന്നു. ഈ സമയത്താണ് വെടിപൊട്ടിയത്. തോക്ക് വൃത്തിയാക്കുന്നതിനിടെ പിസ്റ്റളിലെ ഒരു തിര പുറത്തെടുക്കാൻ കഴിഞ്ഞിരുന്നില്ല. ചേംബറിൽ വെടിയുണ്ട കുരുങ്ങുകയായിരുന്നു. തുടർന്ന് തോക്ക് നിലത്തേക്ക് ചൂണ്ടി വീണ്ടും വൃത്തിയാക്കുന്നതിനിടെ വെടി പൊട്ടുകയായിരുന്നു.