ഇനി അസിസ്​റ്റൻറുമാരല്ല;  സ്​കൂൾ ടീച്ചർ തന്നെ

തിരുവനന്തപുരം: സംസ്ഥാനത്തെ സ്​കൂളുകളിലെ അധ്യാപക തസ്​തികകൾ സ്​കൂൾ അസിസ്​റ്റൻറ്​ എന്നത്​ സ്​കൂൾ ടീച്ചർ എന്ന്​ പുനർനാമകരണം ചെയ്​ത്​ സർക്കാർ ഉത്തരവ്​. കേരള വിദ്യാഭ്യാസ ചട്ടങ്ങൾ (കെ.ഇ.ആർ) പ്രകാരം സംസ്ഥാനത്തെ വിദ്യാലയങ്ങളിലെ അധ്യാപക തസ്തികകൾ നാമകരണം ചെയ്തിരിക്കുന്നത് എൽ.പി സ്കൂൾ അസിസ്​റ്റൻറ്​ (എൽ.പി.എസ്​.എ), യു.പി സ്കൂൾ അസിസ്​റ്റൻറ്​ (യു.പി.എസ്​.എ), ഹൈസ്കൂൾ അസിസ്​റ്റൻറ്​ (എച്ച്​.എസ്​.എ), ട്രെയിനിങ്​ സ്കൂൾ അസിസ്​റ്റൻറ്​ (ടി.എസ്​.എ) എന്നിങ്ങനെയാണ്. 

കേന്ദ്ര വിദ്യാഭ്യാസ അവകാശ നിയമങ്ങളും അവയെ അടിസ്ഥാനമാക്കി സംസ്ഥാന ചട്ടങ്ങളും പുറപ്പെടുവിച്ചപ്പോൾ അധ്യാപകൻ എന്നതിന് ‘ടീച്ചർ’ എന്ന പദമാണ് ഉപയോഗിച്ചിട്ടുള്ളത്. ഈ സാഹചര്യത്തിൽ സംസ്ഥാനത്തെ വിദ്യാലയങ്ങളിലെ അധ്യാപക തസ്തികകൾ എൽ.പി സ്കൂൾ ടീച്ചർ(എൽ.പി.എസ്​.ടി), യു.പി സ്കൂൾ ടീച്ചർ(യു.പി.എസ്​.ടി), ഹൈസ്കൂൾ ടീച്ചർ(എച്ച്​.എസ്​.ടി), ട്രെയിനിങ്​ സ്കൂൾ ടീച്ചർ (ടി.എസ്​.ടി) എന്നിങ്ങനെ ഉടൻ പ്രാബല്യത്തിൽ വരത്തക്കവിധം പുനർ നാമകരണം ചെയ്താണ്​ ഉത്തരവായത്​. ഇതിനായി കേരള വിദ്യാഭ്യാസ ചട്ടത്തിൽ ഭേദഗതി വരുത്തും.