സാ​േങ്കതിക ആശ്വാസം; സർക്കാറിന്​ രാഷ്​ട്രീയ 'ലൈഫ്​ ലൈൻ'

തിരുവനന്തപുരം: ലൈഫ്​ മിഷനിൽ സി.ബി.​െഎ അന്വേഷണം സ്​റ്റേ ചെയ്​ത വിധി സർക്കാറിനും എൽ.ഡി.എഫിനും ആശ്വാസം നൽകുന്നത്​ സാ​േങ്കതികാർഥത്തിൽ മാത്രം. പ്രതിപക്ഷ ആരോപണങ്ങളിലും തലങ്ങും വിലങ്ങുമുള്ള കേന്ദ്ര ഏജൻസികളുടെ അന്വേഷണത്തിലും കഴുത്തറ്റം മുങ്ങിയ സി.പി.എമ്മിന്​ പക്ഷേ,​ വിധി രാഷ്​ട്രീയ 'ലൈഫ്​ ലൈൻ' ആണ്​.

എഫ്​.​െഎ.ആർ റദ്ദാക്കാൻ കോടതി തയാറായിട്ടില്ല​. അന്വേഷണം തന്നെ റദ്ദാക്കണമെന്ന ആവശ്യവും അംഗീകരിച്ചില്ല. മാത്രമല്ല, യൂനിടെക്കിനും സന്തോഷ്​ ഇൗപ്പനുമെതിരായ അന്വേഷണം തുടരാമെന്ന നിർദേശം സർക്കാറിലേക്ക്​ ഏതു നേരവും എത്താനുള്ള സാധ്യതയും നിലനിർത്തുന്നു.

അന്വേഷണം നിലനിൽക്കുന്നു എന്നു​ കൂടി വിലയിരുത്തിയാണ്​ സർക്കാറിന്​ സന്തോഷിക്കാൻ ഒന്നുമില്ലെന്ന്​ പ്രതിപക്ഷം വാദിക്കുന്നത്​. സി.ബി.​െഎ ഡിവിഷൻ ബെഞ്ചിനെ സമീപിക്കാനുള്ള സാധ്യതയും നിലനിൽക്കുന്നു​​. ​

പ്രതിസ്ഥാനത്തുള്ള സന്തോഷ്​ ഇൗപ്പനും സർക്കാറും ഒരുമിച്ചാണ്​ ​ നിയമപോരാട്ടം നടത്തിയതെന്നത്​​ പ്രതിപക്ഷ ആക്ഷേപത്തിന്​ ശക്തി പകരും. ലൈഫ്​ മിഷനിൽ സി.ബി.​െഎ ഇടപെടലിനെ ആദ്യം മുതൽ ചോദ്യം ചെയ്​തത്​ മുഖ്യമന്ത്രിയും സി.പി.എമ്മുമാണ്​.

വിദേശ സംഭാവന ലൈഫ്​ മിഷൻ വാങ്ങിയിട്ടില്ല, എഫ്​.സി.ആർ.​െഎ വകുപ്പ്​ പ്രകാരം മിഷനെ പ്രതിപ്പട്ടികയിൽ ചേർത്തത്​ ന്യായീകരിക്കാനാവില്ല എന്നീ ​പരാമർശങ്ങൾ തങ്ങളുടെ നിലപാടിനെ ന്യായീകരിക്കാൻ ധാരാളമെന്ന വിലയിരുത്തലാണ്​ സർക്കാറിന്​.

രാഷ്​ട്രീയ താൽപര്യങ്ങള്‍ക്കായി അന്വേഷണ ഏജന്‍സികളെ ദുരുപയോഗിക്കലാണ്‌ അന്വേഷണമെന്ന വാദം വിധി ന്യായീകരിക്കുന്നെന്നാണ്​ മുഖ്യമന്ത്രിയുടെയും​ സി.പി.എമ്മി​െൻറയും നിലപാട്​. അതിനാൽ ഇടക്കാല വിധി ആശ്വാസ വായു തന്നെയാണ്​ സർക്കാറിന്​. പക്ഷേ, യൂനിടാക്കിന്​ എതിരായ അന്വേഷണം സർക്കാറിലേക്ക്​ എത്തുമോയെന്ന ആശങ്കയുമുണ്ട്​​.