ദേവസ്വം ബോർഡിന് കീഴിലെ ക്ഷേത്രങ്ങളും സ്ഥാപനങ്ങളും രാഷ്ട്രീയ ആവശ്യങ്ങൾക്ക് ഉപയോഗിക്കരുത്; കർശന നിർദേശവുമായി ഹൈകോടതി

കൊച്ചി: തിരുവിതാംകൂർ ദേവസ്വം ബോർഡിനുകീഴിലെ ക്ഷേത്രങ്ങളും സ്ഥാപനങ്ങളും രാഷ്ട്രീയ ആവശ്യങ്ങൾക്ക് ഉപയോഗിക്കാൻ അനുവദിക്കരുതെന്ന്​ ഹൈകോടതി. രാഷ്ട്രീയ ആവശ്യങ്ങൾക്കും മറ്റും മതസ്ഥാപനങ്ങൾ ദുരുപയോഗം ചെയ്യുന്നത് തടയുന്ന (റിലീജിയൻസ് ഇൻസ്റ്റിറ്റ്യൂഷൻസ് -പ്രിവൻഷൻ ഓഫ് മിസ്‌യൂസ്) നിയമം കർശനമായി പാലിക്കണമെന്ന്​ ദേവസ്വം ബോർഡിനും ഉദ്യോഗസ്ഥർക്കും ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് എസ്. മുരളീകൃഷ്ണ എന്നിവരടങ്ങുന്ന ഡിവിഷൻ ബെഞ്ച്​ നിർദേശം നൽകി. നിയമലംഘനമുണ്ടായാൽ ക്ഷേത്ര ഉപദേശക സമിതി ഭാരവാഹികൾ ഉൾപ്പെടെ ഉത്തരവാദികളായവർക്കെതിരെ കർശന നടപടി സ്വീകരിക്കണമെന്നും ഇക്കാര്യങ്ങളെല്ലാം വ്യക്തമാക്കി ദേവസ്വം കമീഷണർ സർക്കുലർ ഇറക്കണമെന്നും കോടതി ആവശ്യപ്പെട്ടു.

കൊല്ലം കടയ്​ക്കൽ ദേവീക്ഷേത്രത്തിലെ ഉത്സവത്തോടനുബന്ധിച്ച്​ നടന്ന പരിപാടിയിൽ വിപ്ലവ ഗാനം പാടിയതിനെതിരായ ഹരജിയിലാണ്​​ കോടതി നിർദേശം. ഉത്സവത്തോടനുബന്ധിച്ച് മാർച്ച് 10ന് അലോഷി അവതരിപ്പിച്ച ഗാനമേളക്കിടെയാണ്​ വിപ്ലവഗാനം പാടിയത്. ക്ഷേത്രത്തിൽ ആചാരലംഘനമുൾപ്പെടെ ആരോപിച്ച് അഡ്വ. വിഷ്ണു സുനിൽ പന്തളം നൽകിയ ഹരജിയാണ്​ കോടതിയു​ടെ പരിഗണനയിലുള്ളത്​. സ്​റ്റേജിലെ എൽ.ഇ.ഡി ചുവരിൽ സി.പി.എമ്മിന്‍റെയും ഡി.വൈ.എഫ്​.ഐയുടെയും ചിഹ്​നം പ്രദർശിപ്പിച്ചിരുന്നതായി മാധ്യമവാർത്തകളിലും വിഡിയോയിലും നിന്ന്​ വ്യക്തമാണെന്ന്​ കോടതി പറഞ്ഞു.

ദേവസ്വം ചീഫ് വിജിലൻസ് ആന്‍ഡ്​​ സെക്യൂരിറ്റി ഓഫിസറുടെ റിപ്പോർട്ടിലും ഈ പരാമർശമുണ്ട്​. ഇത്​ ഓപറേറ്ററുടെ ഭാഗത്ത്​ നിന്നുണ്ടായ അബദ്ധമാണെന്നായിരുന്നു ക്ഷേ​ത്രോപദേശക സമിതി പ്രസിഡന്‍റിന്‍റെ വിശദീകരണം. ഭക്തർ ഇക്കാര്യം ചൂണ്ടിക്കാട്ടിയപ്പോൾതന്നെ അത്​ നിർത്തുകയും ചെയ്തു​. എന്നാൽ, ഇത്​ ലാഘവത്തോടെ കാണാനാവില്ലെന്ന്​ കോടതി വ്യക്തമാക്കി. സംഗീത പരിപാടി നടക്കുമ്പോൾ സ്റ്റേജിനുസമീപം കുപ്പിയൊക്കെ പിടിച്ച് നൃത്തം ചെയ്യുന്നവരെ കാണാമായിരുന്നുവെന്നും ഇവരെ വിശ്വാസികളായി കാണാനാകില്ലെന്നും വാക്കാൽ പറഞ്ഞു.

ഇത്തരം പരിപാടികൾ ആരാണ്​ ക്ഷേത്രത്തിനകത്ത്​ അനുവദിച്ചതെന്നും ക്രിമിനൽ കേസുകളിലെ പ്രതി എങ്ങനെയാണ് ക്ഷേത്രോപദേശക സമിതി പ്രസിഡന്‍റാകുന്നതെന്നും കോടതി ചോദിച്ചു. ഇതുമായി ബന്ധപ്പെട്ട കമ്മിറ്റിയിൽ ബോർഡ്​ പ്രതിനിധികളും ഉൾപ്പെട്ടിട്ടുണ്ടായിരുന്നുവെന്നായിരുന്നു മറുപടി. വ്യാപാരി വ്യവസായി സംഘടന സ്​പോൺസർ ചെയ്ത പരിപാടിയാണ്​ നടന്നത്​. നാല്​ കേസ്​ മാത്രമാണ്​ പ്രസിഡന്‍റിനെതിരെയുള്ളത്​. ബാക്കിയെല്ലാം തീർപ്പായി. എങ്ങനെയാണ്​ കേസുകൾ തീർപ്പായതെന്നും ഉത്സവത്തിലെ സംഗീത പരിപാടിക്ക്​ എത്ര ​തുക ചെലവായെന്നുമുള്ള കോടതിയുടെ ചോദ്യത്തിന്​ സത്യവാങ്​മൂലം സമർപ്പിക്കാമെന്ന്​ മറുപടി നൽകി. സർക്കാറും വിശദീകരണത്തിന്​ സമയം തേടിയതോടെ ഹരജി വീണ്ടും 10ന്​ പരിഗണിക്കാൻ മാറ്റി. കടയ്​ക്കൽ സ്റ്റേഷൻ ഹൗസ് ഓഫിസറെ കക്ഷി ചേർക്കണമെന്ന ആവശ്യവും കോടതി അനുവദിച്ചു.