തട്ടിക്കൊണ്ടു പോയ ഭീകരർ തന്നെ പീഡിപ്പിച്ചില്ലെന്ന് ഫാ. ടോം ഉഴുന്നാലിൽ

വത്തിക്കാൻ സിറ്റി: തട്ടിക്കൊണ്ടുപോയ ഭീകരർ ഒരുതരത്തിലും തന്നെ പീഡിപ്പിച്ചില്ലെന്ന് ഫാ.ടോം ഉഴുന്നാലിൽ. മോശമായ പെരുമാറ്റവും ഉണ്ടായില്ല. തടവിലിരിക്കെ ഒരുഘട്ടത്തിലും ഭയപ്പെട്ടില്ലെന്നും അദ്ദേഹം പറഞ്ഞു. റോമിലെ സലേഷ്യൻ  സഭ ആസ്ഥാനത്ത് നടത്തിയ വാർത്തസമ്മേളനത്തിൽ സംസാരിക്കുകയായിരുന്നു അദ്ദേഹം. പത്തുദിവസത്തിനകം കേരളത്തിലെത്തും. പാസ്​പോർട്ടില്ലാത്തതാണ്​ മടക്ക യാത്രക്ക്​ തടസ്സം. പുതിയ പാസ്​പോർട്ട്​ ലഭിക്കാനുള്ള നടപടികൾ അന്തിമഘട്ടത്തിലാണ്​. ഇത്​ ലഭിക്കുന്ന താമസം മാത്രമേ നാട്ടിലേക്ക്​ മടക്കത്തിന്​ തടസ്സമായുള്ളൂ.

തന്നെ  കണ്ണുകെട്ടിയാണ് പലയിടങ്ങളിലും കൊണ്ടുപോയത്. 18 മാസത്തിനിടെ രണ്ടോ മൂന്നോ തവണ താവളം മാറ്റി. ശരീരം മെലിഞ്ഞത്​ പ്രമേഹം മൂലമാണ്​. പ്രമേഹത്തിനുള്ള മരുന്നും കൃത്യമായി നൽകി. ഡോക്ടറുടെ സേവനവും ലഭ്യമാക്കി. ഒന്നരവർഷവും ഒരേ വസ്ത്രമാണ്​ ധരിച്ചത്. തട്ടിക്കൊണ്ടുപോയവർ അറബിയാണ്​ സംസാരിച്ചത്. അതിനാൽ ആശയവിനിമയം ബുദ്ധിമുട്ടായിരുന്നു. അൽപം ചില ഇംഗ്ലീഷ് വാക്കുകൾ കൊണ്ടായിരുന്നു സംസാരമത്രയും. തടവിനിടെ പ്രാർഥനകളിലാണ് ഏറെസമയവും  ചെലവിട്ടത്. അതുകൊണ്ട്​ ഒരുഘട്ടത്തിലും ഭയപ്പെട്ടില്ല. ദൈവത്തി​​െൻറ ശക്​തിയിലെ വിശ്വാസമാണ്​ ഇതിന്​ നിദാനം. അൾത്താരയും വിശ്വാസിസമൂഹവും ഇല്ലെങ്കിലും ദിവസവും മനസ്സിൽ കുർബാന അർപ്പിച്ചിരുന്നു. കാണാപ്പാഠം പഠിച്ച പ്രാർഥനകൾ നിരന്തരം ചൊല്ലി. തടവിനിടെ  താൻ കൊല്ലപ്പെടുമെന്ന് ഒരിക്കൽപോലും ചിന്തിച്ചിരുന്നില്ല-ഉഴുന്നാലിൽ പറഞ്ഞു. 

യമനിൽനിന്ന്​ 18 മാസത്തെ തടവിനുശേഷം വത്താക്കിനാൽ എത്തിയ ഫാ. ടോം ആദ്യമായാണ്​ മാധ്യമങ്ങളെ കണ്ടത്​. നേര​േത്ത അദ്ദേഹം ഫ്രാൻസിസ്  മാർപാപ്പയെ സന്ദർശിച്ച് അനുഗ്രഹം തേടിയിരുന്നു. കഴിഞ്ഞദിവസം ശാരീരികാവശത മറികടന്ന് കർമജീവിതത്തിലേക്ക്​ മടങ്ങിയെത്തുമെന്ന്​ ഫാ. ടോം വിഡിയോ സന്ദേശത്തിൽ പറഞ്ഞിരുന്നു. മോചനത്തിനായി ദൈവത്തോട് അപേക്ഷിച്ചവര്‍ക്കും ഭൂമിയില്‍ പ്രവര്‍ത്തിച്ചവര്‍ക്കും നന്ദി. എ​​െൻറ മോചനം സാധ്യമാക്കിയവരെ ദൈവം അനുഗ്രഹിക്ക​െട്ടയെന്നും വ്യക്തമാക്കിയിരുന്നു.