ടൂറിസ്​റ്റ്​ ബസുകളുടെ നിറംമാറ്റില്ല; ഡ്രൈവിങ്​ സ്കൂൾ വാഹനങ്ങൾക്ക്​ ഇനി മഞ്ഞ നിറം

തിരുവനന്തപുരം: ടൂറിസ്​റ്റ്​ ബസുകൾക്ക്​ നിലവിലെ വെള്ളനിറം ഒഴിവാക്കാനുള്ള നീക്കത്തിൽനിന്ന്​ ഗതാഗത വകുപ്പ്​ പിൻവാങ്ങി. വിഷയം ഔദ്യോഗിക അജണ്ടയായി ​സംസ്ഥാന ട്രാൻസ്​പോർട്ട്​ അതോറിറ്റി യോഗത്തിന്‍റെ (എസ്​.ടി.എ) പരിഗണനക്കെത്തിയെങ്കിലും നേരത്തെയെടുത്ത നിലപാട്​ പുനഃപരിശോധിക്കേണ്ടതി​ല്ലെന്നാണ്​ തീരുമാനം. അതേസമയം സംസ്ഥാനത്തെ ഡ്രൈവിങ്​ സ്കൂൾ വാഹനങ്ങളുടെ നിറം ​നിലവിലെ സ്കൂൾ ബസുകളുടെ മാതൃകയിൽ മഞ്ഞ നിറത്തിലേക്ക്​ മാറ്റാനും എസ്​.ടി.എ തീരുമാനിച്ചു. ഒക്​ടോബർ ഒന്നുമുതൽ തീരുമാനം പ്രാബല്യത്തിൽവരും.

ഒമ്പത്​ പേർ മരിച്ച വടക്കഞ്ചേരി ബസ് അപകടത്തി​ന്‍റെ പശ്ചാത്തലത്തിലാണ്​ ആന്‍റണി രാജു ഗതാഗത മന്ത്രിയായിരുന്ന കാലത്ത്​ ടൂറിസ്റ്റ് ബസുകള്‍ക്ക് വെള്ളനിറം നിര്‍ബന്ധമാക്കി ഉത്തരവിറക്കിയത്​. ബഹുവർണവും സിനിമ നടൻമാരുടെയും മറ്റും കൂറ്റൻഗ്രാഫിക്​ ചിത്രങ്ങളുമടക്കം രാത്രികാഴ്ചക്ക്​ പ്രയാസം സൃഷ്ടിക്കുന്നുവെന്ന കണ്ടെത്തലിലായിരുന്നു വെള്ള നിറത്തിലേക്കുള്ള മാറ്റം. എന്നാൽ മന്ത്രി മാറിയതോടെയാണ്​ ബസുകളുടെ നിറമാറ്റത്തിനും നീക്കമുണ്ടായത്​. അതേസമയം എസ്​.ടി.എ യോഗത്തിന്​ മുന്നിൽ ടൂറിസ്റ്റ്​ ഉടമകളിൽ നിന്നടക്കം വ്യത്യസ്ത അഭിപ്രായങ്ങളാണ്​ ലഭിച്ചതെന്ന്​ ഇത്​ സംബന്ധിച്ച്​ തീരുമാനക്കുറിപ്പിൽ പറയുന്നു. ബസുമടകൾ ഒരുവിഭാഗം അനുകൂലിച്ചപ്പോ​ൾ ​മറ്റൊരു വിഭാഗം എതിർത്തു. ഈ സാഹചര്യത്തിൽ ഹൈകോടതി നിർദേശം കൂടി കണക്കിലെടുത്താണ്​ മുൻതീരുമാനം പുനഃപരിശോധിക്കേണ്ടതില്ലെന്ന നിലപാടിലേക്കെത്തിയതെന്നാണ്​ കുറിപ്പിലുള്ളത്​.

ഡ്രൈവിങ്​ സ്​കൂൾ വാഹനങ്ങളും നിറം ഏകീകരണവും ഔദ്യോഗിക അജണ്ടായായാണ്​ എസ്​.ടി.എ യോഗത്തി​ന്‍റെ പരിഗണനക്കെത്തിയത്​. ഇരുചക്ര വാഹനങ്ങൾക്ക്​ നിറം മാറ്റം ബാധകമല്ല. നിലവിൽ പരിശീലന വാഹനങ്ങൾക്ക്​ ഏകീകൃത നിറമില്ല. പലതരം വാഹനങ്ങളിൽ ‘എൽ’ ബോർഡ്​ വെക്കുകയോ സ്​കൂളിന്‍റെ പേര്​ എഴുതുകയോ വാഹനത്തിന്​ മുകളിൽ ​പിരമിഡ്​ സ്വഭാവത്തിലുള്ള ബോർഡ്​ വെക്കുകയോ ആണ്​ ചെയ്യുന്നത്​. റോഡിൽ ഡ്രൈവിങ്​ സ്കൂൾ വാഹനങ്ങളെ തിരിച്ചറിയാൻ ഇത്​ പര്യാപ്​തമ​ല്ലെന്നാണ്​ മോട്ടോർ വാഹന വകുപ്പിന്‍റെ വിലയിരുത്തൽ. അതേസമയം ഡ്രൈവിങ്​ ടെസ്റ്റ്​ പരിഷ്കരണത്തിന്‍റെ പേരിൽ നടന്ന സമരത്തിന്‍റെ പശ്ചാത്തലത്തിൽ സ്കൂൾ ഉടമകൾക്കെതിരെയുള്ള നീക്കമാണിതെന്ന ആ​ക്ഷേപവുമുയർന്നിട്ടുണ്ട്​. നിറംമാറ്റത്തിന്​ വലിയ ചെലവ്​ വരും. ഇത്​ അധിക ബാധ്യത സൃഷ്ടിക്കുമെന്നാണ്​ സ്കൂൾ ഉടമകൾ വ്യക്​തമാക്കുന്നത്​. സംസ്​ഥാനത്ത്​ ഏതാണ്ട്​ 32,000 പരിശീലന വാഹനങ്ങളാണുള്ളത്​.