തനി​െക്കന്ത് സംഭവിച്ചാലും ഉത്തരവാദി എൽദോസെന്ന്​ പരാതിക്കാരി

തിരുവനന്തപുരം: പെരുമ്പാവൂർ എം.എൽ.എ എൽദോസ് കുന്നപ്പിള്ളിക്കെതിരെ വീണ്ടും ആരോപണവുമായി പരാതിക്കാരി. വ്യാജ തെളിവുകൾ ഹാജരാക്കിയാണ്​ എം.എൽ.എ ജാമ്യം തേടിയതെന്നും തനിക്കെന്ത് സംഭവിച്ചാലും ഉത്തരവാദി എൽദോസ് കുന്നപ്പിള്ളിയായിരിക്കുമെന്നും അവർ മാധ്യമപ്രവർത്തകരോട്​ പറഞ്ഞു. തനിക്ക്​ നേരെ ഇപ്പോഴും എം.എൽ.എയുടെ ഭീഷണി തുടരുന്നു. ഇക്കാര്യം പൊലീസിനും പരാതിയായി നൽകി​. എം.എൽ.എക്കെതിരെയുള്ള ബലാത്സംഗ, വധശ്രമക്കേസിൽനിന്ന് പിന്മാറണമെന്നും പൊലീസിൽ മൊഴി നൽകരുതെന്നും ഇപ്പോഴും ആവശ്യപ്പെടുന്നതായാണ്​ പരാതിക്കാരിയുടെ ആരോപണം​.

കോൺഗ്രസിലെ വനിതാ പ്രവര്‍ത്തക ഇപ്പോഴും ഭീഷണി സന്ദേശമയക്കുന്നു. ഇതു സംബന്ധിച്ച്​ താൻ സൈബര്‍ പൊലീസിന് പരാതി നൽകി. എം.എൽ.എ കോടതിയെ തെറ്റിദ്ധരിപ്പിക്കുകയാണ്​. വ്യാജ തെളിവുകളാണ്​ ഹാജരാക്കുന്നത്​. അങ്ങനെയാണ്​ മുൻകൂർ ജാമ്യമുൾപ്പെടെ നേടിയത്​. ഇക്കാര്യങ്ങൾ ചൂണ്ടിക്കാട്ടി പ്രതിപക്ഷ നേതാവിനും മുഖ്യമന്ത്രിക്കും പരാതി നൽകും. എം.എൽ.എയുടെ മുൻകൂർ ജാമ്യാപേക്ഷ റദ്ദാക്കണമെന്നാവശ്യപ്പെട്ട്​ ഹൈകോടതിയെ സമീപിക്കുമെന്നും പരാതിക്കാരി പറഞ്ഞു. പരാതി ഉന്നയിച്ചതി‍െൻറ പേരിൽ തന്നെ ഏറ്റവും വലിയ മോശക്കാരിയായി ചിത്രീകരിക്കാനുള്ള ശ്രമമാണ്​ എം.എൽ.എ നടത്തു​ന്നത്​. ഓൺലൈൻ മാധ്യമങ്ങളിലൂടെ തന്നെ വ്യക്തിഹത്യ ചെയ്യുന്ന നിലയിലുള്ള വാർത്തകൾ നിരന്തരം പ്രചരിപ്പിക്കുകയാണെന്നും അവർ കൂട്ടിച്ചേർത്തു.

അതിനി​ടെ, എൽദോസ്​ കുന്നപ്പിള്ളിക്കെതിരെ പുതിയ സൈബർ കേസെടുത്തു. ചില ഓൺലൈൻ മാധ്യമങ്ങളെ ഉപയോഗിച്ച്​ തനിക്കെതിരെ വ്യാജ വാർത്തകൾ ചമച്ച്​ സംപ്രേഷണം ചെയ്യുന്നെന്ന പരാതിയുടെ അടിസ്ഥാനത്തിൽ പേട്ട പൊലീസ്​ രജിസ്റ്റർ ചെയ്ത കേസിൽ അന്വേഷണം പുരോഗമിക്കുകയാണ്​.