സത്യപ്രതിജ്ഞ നടക്കാനിരിക്കുന്ന സെൻട്രൽ സ്​റ്റേഡിയത്തിലെ തൊഴിലാളിക്ക്​ കോവിഡ്

തിരുവനന്തപുരം: രണ്ടാം പിണറായി മന്ത്രിസഭയുടെ സത്യപ്രതിജ്ഞ ചടങ്ങിനുള്ള ഒരുക്കങ്ങൾ പുരോഗമിക്കുന്നതിനിടെ തൊഴിലാളിക്ക്​ കോവിഡ്​ സ്ഥിരീകരിച്ചു. സത്യപ്രതിജ്ഞ നടക്കുന്ന സെൻട്രൽ സ്​റ്റേഡിയത്തിൽ നിർമാണ ജോലികളിൽ ഏർപ്പെട്ടിരുന്ന ഇലക്​ട്രിക്കൽ തൊഴിലാളിക്ക്​ കോവിഡ്​ സ്ഥിരീകരിച്ചുവെന്ന റിപ്പോർട്ടുകളാണ്​ പുറത്ത്​ വരുന്നത്​. വ്യാഴാഴ്ചയാണ്​ രണ്ടാം പിണറായി മന്ത്രിസഭയുടെ സത്യപ്രതിജ്ഞ നടക്കുക.

അതേസമയം, സത്യപ്രതിജ്ഞ ചടങ്ങിൽ പ​ങ്കെടുക്കുന്നവരുടെ എണ്ണം കുറക്കണമെന്ന ആവശ്യം സി.പി.എമ്മിൽ നിന്ന്​ തന്നെ ഉയർന്നുവെന്ന റിപ്പോർട്ടുകളും പുറത്ത്​ വരുന്നുണ്ട്​. പാർട്ടിയുടെ കണ്ണൂർ ജില്ലാ സെക്രട്ടറി എം.വി ജയരാജനാണ്​ പാർട്ടിയിൽ ഇത്തരമൊരു ആവശ്യം ഉന്നയിച്ചത്​. 500 കസേരകൾ ചടങ്ങിലുണ്ടാവുമെന്നും അത്ര പേർ ചടങ്ങിനെത്തില്ലെന്നുമാണ്​​​ സി.പി.എം വിശദീകരണം.

ട്രിപ്പിൾ ലോക്​ഡൗൺ നിലനിൽക്കുന്ന തിരുവനന്തപുരത്ത്​ നടക്കുന്ന സത്യപ്രതിജ്ഞക്കെതിരെ വിമർശനങ്ങൾ സജീവമാണ്​. പ്രതിപക്ഷം ചടങ്ങ്​ ബഹിഷ്​കരിക്കുകയും ചെയ്​തിട്ടുണ്ട്​. നിരവധി പ്രമുഖർ സത്യപ്രതിജ്ഞ ചടങ്ങ്​ വിർച്വലായി നടത്തണമെന്ന്​ ആവ​ശ്യപ്പെട്ടിട്ടുണ്ട്​.