കുഞ്ഞിരാമന്‍റെ രക്തസാക്ഷിത്വദിനത്തിൽ 2273 കേന്ദ്രങ്ങളിൽ വർഗീയതക്കെതിരെ ബഹുജന കൂട്ടായ്മ സംഘടിപ്പിക്കുമെന്ന്​ സി.പി.എം

തിരുവനന്തപുരം: 'കേരളത്തെ കലാപഭൂമിയാക്കരുത്' എന്ന മുദ്രാവാക്യവുമായി ജനുവരി 4-ാം തീയതി വർഗീയതക്കെതിരെ ബഹുജന കൂട്ടായ്മ സംഘടിപ്പിക്കു​മെന്ന്​ സിപിഎം. തലശ്ശേരിയിൽ മുസ്ലീം ആരാധനാലയം സംരക്ഷിക്കുന്നതിനിടയിൽ ആർ.എസ്.എസുർ കൊലപ്പെടുത്തിയ സഖാവ് യു.കെ കുഞ്ഞിരാമന്‍റെ രക്തസാക്ഷിത്വദിനത്തിലാണ് പരിപാടി സംഘടിപ്പിക്കുന്നതെന്ന്​ സംസ്ഥാന സെക്രട്ടറിയേറ്റ് പ്രസ്താവനയിൽ അറിയിച്ചു. .

സമാധാനന്തരീക്ഷം നിലനിൽക്കുന്ന കേരളീയ സമൂഹത്തിൽ സംഘർഷം സൃഷ്ടിക്കാനും അതുവഴി നാടിനെ വർഗ്ഗീയ കലാപങ്ങളിലേക്ക് തള്ളിവിടാനുമാണ് ആർ.എസ്.എസും എസ്​.ഡി. പി.ഐയും പരിശ്രമിക്കുന്നത്. സമീപകാലത്ത് വർഗീയ പ്രചാരം കേരളത്തിൽ വലിയതോതിൽ നടക്കുകയാണ്. കഴിഞ്ഞ നിയമസഭാ തെരഞ്ഞെടുപ്പിൽ ദയനീയമായി പരാജയപ്പെട്ട ബി.ജെ.പി വർഗീയ ധ്രുവീകരണത്തിലുടെ തിരിച്ചുവരാനാകുമോ എന്നാണ് ശ്രമിക്കുന്നത്. ഇതിന് സഹായകരമായ നിലപാടാണ് എസ്​.ഡി.പി.ഐയും സ്വീകരിക്കുന്നത്. ഇത്തരം സംഭവങ്ങളെ ഊതിവീർപ്പിക്കാനും സർക്കാരിനെതിരെ തിരിച്ചുവിടാനുമുള്ള ഇടപെടലുകളാണ് യു.ഡി.എഫിന്‍റെ ഭാഗത്തുനിന്നും ഉണ്ടാകുന്നത്. ഈ പശ്ചാത്തലത്തിലാണ് സംസ്ഥാനത്ത് സമാധാനാന്തരീക്ഷം നിലനിർത്തുന്നതിനുള്ള ആഹ്വാനവുമായി ബഹുജന കൂട്ടായ്മകൾ സംഘടിപ്പിക്കുന്നതെന്ന്​ സി.പി.എം അറിയിച്ചു.

2273 കേന്ദ്രങ്ങളിലാണ് ബഹുജന കൂട്ടായ്മകൾ സംഘടിപ്പിക്കുന്നതെന്ന്​ ​സി.പി.എം സെക്രട്ടറിയേറ്റ്​ അറിയിച്ചു.