സംസ്ഥാനം ഭരിക്കുന്ന രാഷ്​ട്രീയപാർട്ടി സ്വർണക്കടത്ത്​ അന്വേഷണത്തിൽ ഇടപ്പെട്ടുവെന്ന്​ കസ്റ്റംസ്​ കമീഷണർ

തിരുവനന്തപുരം: സംസ്ഥാനം ഭരിക്കുന്ന പാർട്ടി സ്വർണക്കടത്ത്​ കേസ്​ അന്വേഷണത്തിൽ ഇടപ്പെട്ടുവെന്ന ആരോപണം ആവർത്തിച്ച്​ കസ്റ്റംസ്​ കമീഷണർ സുമിത്​ കുമാർ. കസ്റ്റംസിനെ സ്വാധീനിക്കാനുള്ള ശ്രമമുണ്ടായി. ഏജൻസിയെ കേരള സർക്കാറിനെതിരെ ഉപയോഗിക്കുന്നുവെന്ന ആരോപണം ശരിയല്ലെന്നും അദ്ദേഹം പറഞ്ഞു.

കസ്റ്റംസിനെ സ്വാധീനിക്കാൻ പലരും ശ്രമിക്കാറുണ്ട്​. എന്നാൽ, അത്തരം സ്വാധീനങ്ങൾക്കൊന്നും വഴങ്ങുന്ന ഏജൻസിയല്ല കസ്റ്റംസ്​. സ്വർണക്കടത്ത്​ കേസിൽ പൊലീസിന്​ വീഴ്ചപ്പറ്റി. കുറ്റപ്പത്രം പോലും സമർപ്പിക്കാൻ പൊലീസിനായില്ല. കസ്റ്റംസ്​ ഉദ്യോഗസ്ഥർക്കെതിരായ ആക്രമണത്തിലും പൊലീസ്​ നിരുത്തരവാദപരമായി പെരുമാറിയെന്നും അദ്ദേഹം പറഞ്ഞു.

ഡോളർക്കടത്ത്​ കേസുമായി കെ.ടി.ജലീലിന്​ നേരിട്ട്​ ബന്ധമില്ല. ചില നയതന്ത്ര ഉദ്യോഗസ്ഥരുമായാണ്​ അദ്ദേഹത്തിന്​ ബന്ധം. ഇതുമായി ബന്ധപ്പെട്ട്​ അന്വേഷണം നടന്നു വരികയാണെന്നും കസ്റ്റംസ്​ കമ്മീഷണർ പറഞ്ഞു. കസ്റ്റംസിനെതിരായ സംസ്ഥാന സർക്കാറിന്‍റെ അന്വേഷണം വിഡ്​ഢിത്തമാണ്​. സർക്കാറിനെതിരെ താൻ ഒരു കമ്മീഷനെ നിയമിച്ചാൽ എങ്ങനെയിരിക്കുമെന്നും അദ്ദേഹം ചോദിച്ചു.