ന്യൂനപക്ഷക്ഷേമ പദ്ധതികളിലെ 80ഃ20 അനുപാതം റദ്ദാക്കിയ വിധി തെറ്റിദ്ധാരണ പരത്തുന്നത്​, സർക്കാർ അപ്പീൽ പോകണം -ഇ.ടി. മുഹമ്മദ്​ ബഷീർ

കോഴിക്കോട്​: ന്യൂനപക്ഷക്ഷേമ പദ്ധതികളിലെ 80ഃ20 അനുപാതം റദ്ദാക്കിയ ഹൈകോടതി വിധിയിൽ സർക്കാർ അപ്പീൽ പോകണമെന്ന്​ മുസ്​ലിം ലീഗ്​ ദേശീയ ഓർഗനൈസിങ്​ സെക്രട്ടറി ഇ.ടി. മുഹമ്മദ്​ ബഷീർ എം.പി. സച്ചാർ കമ്മിറ്റി റിപ്പോർട്ടി​‍െൻറ അടിസ്​ഥാനത്തിൽ മുസ്​ലിം ന്യൂനപക്ഷങ്ങളുടെ ഉന്നമനത്തിന്​ മാത്രമായി നടപ്പാക്കുന്ന പദ്ധതികൾക്ക്​ നീക്കിവെച്ച ഫണ്ടാണെന്ന്​ മനസ്സിലാക്കാതെയാണ്​ ഇത്തരം വിധികളു​ണ്ടാകുന്നത്​.

ഇതിന്​ നീക്കിവെക്കുന്ന ഫണ്ടി​‍െൻറ ഹെഡ്ഡിൽതന്നെ സച്ചാർ കമ്മിറ്റി റിപ്പോർട്ട്​ നടപ്പാക്കാൻ വേണ്ടിയാണെന്ന്​ പ്രത്യേകം പറയുന്നുണ്ട്​. മുസ്​ലിംകൾക്ക്​ 80 ശതമാനവും മറ്റുള്ളവർക്ക്​ 20 ശതമാനവും എന്ന രീതിയിൽ ഇതിനെ ചിത്രീകരിക്കുന്നത്​ തെറ്റിദ്ധരിപ്പിക്കലാണ്​. യഥാർഥത്തിൽ സച്ചാർ റിപ്പോർട്ടി​‍െൻറ അടിസ്​ഥാനത്തിൽ ഇതിനായുള്ള 100 ശതമാനം ഫണ്ടും മുസ്​ലിം ന്യൂനപക്ഷത്തിനുവേണ്ടി നീക്കിവെച്ചതാണ്​.

കോടതിയിൽ സർക്കാർ എങ്ങനെയാണ്​ സത്യവാങ്​മൂലം നൽകിയതെന്ന്​ പഠിക്കേണ്ടതുണ്ട്​. വിഷയത്തിൽ അപ്പീൽ പോകുന്ന കാര്യം മുസ്​ലിം ലീഗ്​ ആലോചിക്കുമെന്നും അദ്ദേഹം കൂട്ടിച്ചേർത്തു.