പ്രവർത്തനം തുടങ്ങിയത്​ ആദിവാസികൾക്കിടയിൽ നിന്ന്​; ചിരിപ്പിച്ച തിരുമേനിയുടെ വേറിട്ട ജീവിതം

മാർത്തോമ്മാ സഭയുടെ അങ്കോള മിഷൻ ഫീൽഡിൽ മിഷനറിയായാണ്​ കഴിഞ്ഞ ദിവസം അന്തരിച്ച ഡോ. ഫിലിപ്പോസ്​ മാർ ക്രിസോസ്റ്റം പ്രവർത്തനം തുടങ്ങുന്നത്​. ആദിവാസികളുടെയും മുക്കുവരുടെയും ഇടയിലായിരുന്നു സേവനം. കടലിൽ മീൻ പിടിക്കാൻ പോകുകയും അവരിൽ ഒരുവനായി ജീവിക്കുകയും ചെയ്​തു. അവരെ പഠിപ്പിച്ചും അവരിൽ നിന്നു പഠിച്ചുമാണ്​ തിരുമേനിയുടെ വൈദിക ജീവിതം രൂപപ്പെടുത്തുന്നത്​.

അടിസ്​ഥാന വർഗത്തിന്‍റെ ജീവിതം അറിയാനായി പല പരീക്ഷണങ്ങളും അദ്ദേഹം നടത്തിയിട്ടുണ്ട്​. തമിഴ്​നാട്ടിൽ വൈദികനായിരിക്കെ ജോലാർപേട്ട്​ റെയിൽവെ സ്​റ്റേഷനിൽ പോർട്ടറായി പണിയെടുക്കുക വരെ ചെയ്​തു. മദ്യത്തിനടിപ്പെട്ട തൊഴിലാളികളെ ജീവിതത്തിലേക്ക്​ തിരിച്ചു കൊണ്ടുവരുന്നതിന്‍റെ ഭാഗമായിരുന്നു അത്​.

ഇന്ത്യയ്ക്കു സ്വാതന്ത്ര്യം കിട്ടുന്നതിനു മുൻപേ മാർ ക്രിസോസ്റ്റത്തിനു ബിരുദം കിട്ടിയിരുന്നു. ബ്രിട്ടീഷ് സർക്കാരിലെ ഉയർന്ന ജോലിയേക്കാൾ ക്രിസോസ്റ്റം ആഗ്രഹിച്ചത് ഗോപാലകൃഷ്ണ ഗോഖലയുടെ ഭാരത സേവാ സംഘത്തിൽ ചേരാനായിരുന്നു. എന്നാൽ, മിഷനറി പ്രവർത്തനങ്ങളുടെ ഭാഗമാകാനായിരുന്നു നിയോഗം.

ചിരിപ്പിക്കുന്ന തിരുമേനി എന്നാണ്​ മാർ ക്രിസോസ്റ്റത്തെ എല്ലാവരും വിളിച്ചത്​. തമാശകൾ പറഞ്ഞും പറയിച്ചും ഏത്​ സാഹചര്യത്തിന്‍റെയും പിരിമുറുക്കം അദ്ദേഹം അലിയിച്ചില്ലാതാക്കി. സഭാ വിശ്വാസികളല്ലാത്തവർക്കിടയിലും പൊതുവേദികളിലും പരിചിതനായി മാറുകയും ചെയ്​തു മാർ ക്രിസോസ്റ്റം.

പ്രായമേറയായിട്ടും പ്രവർത്തന രംഗത്ത്​ തുടരുന്നതിനെ കുറിച്ചും തന്‍റെ പ്രായത്തെ കുറിച്ചും അദ്ദേഹത്തിന്‍റെ നർമം ഏറെ പ്രശസ്​തമാണ്​. മറ്റുള്ളവർ 60-70 വയസിൽ ചെയ്​ത്​ തീർക്കുന്നത്​ തനിക്ക്​ ചെയ്യാൻ 100 വർഷമെങ്കിലും വേണ്ടി വരുമെന്നായിരുന്നു അതേ കുറിച്ചുള്ള അദ്ദേഹത്തിന്‍റെ നർമം.

രാഷ്​ട്രീയ-മത നേതാക്കളുമായെല്ലാം നല്ല ബന്ധം സൂക്ഷിക്കുന്നതിലും അദ്ദേഹം ഏറെ മുന്നിലായിരുന്നു. നരേന്ദ്ര മോദി, സോണിയാ ഗാന്ധി, സീതാറാം യെച്ചൂരി തുടങ്ങിയവരുമായെല്ലാം ബന്ധം സൂക്ഷിക്കാൻ അദ്ദേഹം ശ്രദ്ധിച്ചു.

ഊണു കഴിച്ചു കഴിഞ്ഞാൽ മധുരം നുണയാനായി ഒരു നാരങ്ങാ മിഠായിയെങ്കിലും വേണമെന്നുണ്ടായിരുന്നു മാർ ക്രിസോസ്റ്റം തിരുമേനിക്ക്​. അറിഞ്ഞവർക്കും ഇടപഴകിയവർക്കുമെല്ലാം നാരങ്ങാ മിഠായി പോലെ ഒരിക്കലും മറക്കാത്ത മധുരം സമ്മാനിച്ചാണ്​ അദ്ദേഹം യാത്രയാകുന്നത്​.