കരുളായിയിൽ വയോധികന് രണ്ട്​ ഡോസ് വാക്‌സിന്‍ ഒരുമിച്ച് നൽകി; വിശദീകരണവുമായി മെഡിക്കല്‍ ഓഫിസര്‍

കരുളായി (മലപ്പുറം): കോവിഡ്​ വാക്സിൻ ക്യാമ്പിലെത്തിയ വയോധികന് രണ്ട്​ ഡോസ് ഒരുമിച്ച് കുത്തിവെച്ചതായി പരാതി. കരുളായി പുള്ളിയില്‍ സ്‌കൂളില്‍ ഞായറാഴ്ച നടന്ന ക്യാമ്പിലായിരുന്നു സംഭവം. മുക്കത്ത് താമസിക്കുന്ന കരുവാടന്‍ കാസിമും (62) ഭാര്യ നഫീസയും ഒരുമിച്ചാണ് ഉച്ചക്ക്​ 12ഓടെ ക്യാമ്പിലെത്തിയത്.

ആദ്യമെത്തിയ നഴ്‌സ് ഒരു ഡോസ് വാക്‌സിന്‍ നല്‍കിയെന്നും ഇതറിയാതെ തൊട്ടുപിറകെയെത്തിയ മറ്റൊരു നഴ്‌സ് വീണ്ടും കുത്തിവെച്ചെന്നും കാസിം പറഞ്ഞു. എത്രതവണ കുത്തിവെക്കുമെന്ന് തനിക്ക് അറിയില്ലായിരുന്നെന്നും ഇദ്ദേഹം പറഞ്ഞു.

ഭാര്യക്കും വാക്‌സിന്‍ നല്‍കിയശേഷം ആരോഗ്യ പ്രവര്‍ത്തകര്‍ ഇവരോട്​ പോകാന്‍ പറഞ്ഞു. എന്നാൽ, ഭര്‍ത്താവിന് രണ്ടുതവണ കുത്തിവെച്ചെന്നും തനിക്ക് ഒന്നു മാത്രമേ ലഭിച്ചിട്ടുള്ളൂവെന്നും നഫീസ പറഞ്ഞപ്പോഴാണ് കാസിമിന് രണ്ട്​ ഡോസ് നൽകിയ കാര്യം ആരോഗ്യ പ്രവര്‍ത്തകരും അറിഞ്ഞത്.

തുടർന്ന് അര മണിക്കൂർ നിരീക്ഷണത്തിലിരുത്തിയ ശേഷം ആരോഗ്യ പ്രശ്‌നങ്ങളൊന്നുമില്ലാത്തതിനാൽ തിരിച്ചയച്ചു. ആരോഗ്യ പ്രവർത്തകരുടെ അശ്രദ്ധയാണ് ഇത്തരം പ്രശ്നങ്ങൾക്ക് കാരണമാവുന്നതെന്നാണ്​ ആക്ഷേപമുയർന്നത്​.

എന്നാൽ, തങ്ങളുടെ ഭാഗത്തുനിന്നുണ്ടായ വീഴ്ചയല്ല ഇരട്ട വാക്‌സിന്‍ നല്‍കാന്‍ കാരണമായതെന്നും വാക്‌സിനെടുത്തിട്ടും കാസിം അവിടെത്തന്നെ ഇരുന്നതാണ് വീണ്ടും കുത്തിവെക്കാൻ ഇടയാക്കിയതെന്നും കരുളായി മെഡിക്കല്‍ ഓഫിസര്‍ ഡോ. അനുപമ പറഞ്ഞു.