വിദഗ്ധ സംഘം ദുരന്തബാധിത മേഖലകളില് പരിശോധന ആരംഭിച്ചു
text_fieldsകൽപ്പറ്റ: വയനാട് ദുരന്തത്തിന്റെ പശ്ചാത്തലത്തില് സംസ്ഥാന സര്ക്കാര് നിയോഗിച്ച വിദഗ്ധ സംഘം ദുരന്ത മേഖലകളില് പരിശോധന ആരംഭിച്ചു. ദേശീയ ഭൗമശാസ്ത്ര പഠന കേന്ദ്രത്തിലെ മുതിര്ന്ന ശാസ്ത്രജ്ഞൻ ജോണ് മത്തായിയുടെ നേതൃത്വത്തിലുള്ള അഞ്ചംഗ സംഘമാണ് ഉച്ച വരെ പരിശോധന നടത്തിയത്. ദുരന്ത മേഖലയിൽ പ്രതികൂല കാലവസ്ഥയായതിനാൽ ഉച്ചക്ക് ശേഷം പരിശോധന അവസാനിപ്പിച്ചു.
ഓഗസ്റ്റ് 15 വരെ പരിശോധന തുടരും. ഉരുള്പൊട്ടലിന്റെ പ്രഭവകേന്ദ്രമായ പുഞ്ചിരിമട്ടവും അനുബന്ധ പ്രദേശവും സംഘം വിശദമായ പരിശോധനക്ക് വിധേയമാക്കി. പ്രദേശത്തെ മണ്ണിന്റെയും പാറകളുടെയും സാമ്പിളുകള് ശേഖരിച്ചിട്ടുണ്ട്. ദുരന്തം സംഭവിച്ചതെങ്ങനെയെന്നും ഉരുള്പൊട്ടലില് സംഭവിച്ച പ്രതിഭാസങ്ങളും സംഘം വിലയിരുത്തും. ദുരന്ത പ്രദേശത്തെയും അനുബന്ധ മേഖലകളിലേയും അപകട സാധ്യതകൾ സംഘം വിലയിരുത്തി സർക്കാറിന് റിപ്പോര്ട്ട് സമര്പ്പിക്കും.
സെന്റര് ഓഫ് എക്സലന്സ് ഇന് വാട്ടര് റിലേറ്റഡ് ഡിസാസ്റ്റര് മാനേജ്മെന്റ് (സി.ഡബ്ല്യൂ.ആര്.ഡി.എം.) പ്രിന്സിപ്പല് സയന്റിസ്റ്റും മേധാവിയുമായ ഡോ: ടി.കെ.ദൃശ്യ, സൂറത്ത്കല് എന്ഐടി അസോസിയേറ്റ് പ്രഫ. ഡോ. ശ്രീവല്സ കൊളത്തയാര്, ജില്ലാ മണ്ണ് സംരക്ഷണ ഓഫീസര് താരാ മനോഹരന്, കേരള ദുരന്തനിവാരണ അതോറിട്ടി ഹസാര്ഡ് ആന്ഡ് റിസ്ക് അനലിസ്റ്റ് ജി.എസ്. പ്രദീപ് എന്നിവരാണ് വിദഗ്ധ സംഘത്തിലുള്ളത്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.