വീണ്ടും സ്​നേഹനിധിയായി സുബൈദ; ആടിനെ വിറ്റ് ഇത്തവണയും മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക നല്‍കി

കൊല്ലം: മഹാപ്രളയവും മഹാമാരിയും ആഞ്ഞടിച്ചപ്പോൾ ഒത്തൊരുമയോടെ നേരിട്ട്​ ലോകത്തിന്​ മാതൃകയായ നാടാണ്​ കേരളം. ആ മാതൃകാ സൃഷ്​ടിക്കുപിന്നിൽ ഒട്ടനവധി സഹജീവിസ്​നേഹികളുടെ ത്യാഗങ്ങളുണ്ട്​. അതിലൊരാളാണ്​ കൊല്ലം പോർട്ട്​ സ്വദേശിനി സുബൈദ.

ജീവിതത്തി​െൻറ രണ്ടറ്റം കൂട്ടിമുട്ടിക്കാന​ുള്ള ഒാട്ടത്തിനിടയിലും നാടിനായി തന്നാലാകുന്ന കരുതൽ നൽകുന്ന സുബൈദയാണ്​ വെള്ളിയാഴ്​ച മുഖ്യമന്ത്രിയുടെ വാക്കുകളി​ലൂടെ വീണ്ടും താരമായത്​. ത​െൻറ ജീവിതോപാധിയായ ആടിനെ വിറ്റതി​െൻറ ഒാഹരി വീണ്ടും മുഖ്യമന്ത്രിയുടെ ദുരിതാശ്വാസനിധിയിലേക്ക്​ നൽകിയതാണ്​ സുബൈദ വീണ്ടും ജനശ്രദ്ധയിൽ വരാൻ കാരണം​.

5000 രൂപയാണ്​ ഇത്തവണ നൽകിയത്​. കഴിഞ്ഞവർഷം കോവിഡ്​ പിടിമുറുക്കിത്തുടങ്ങിയപ്പോൾ പ്രാരബ്​ധങ്ങൾ മറന്ന്​, ആടിനെ വിറ്റുകിട്ടിയ തുകയിൽനിന്ന്​​ 5510 രൂപ മുഖ്യ​മന്ത്രിയുടെ ദുരിതാശ്വാസനിധിയിലേക്ക്​ അവർ നൽകി​. അന്ന്​ ഏറെ വാർത്തയായ ആ ദാനത്തിന്​ പിറകെ അഞ്ച്​ ആടുകൾ സമ്മാനമായി ലഭിച്ചു.

ഇത്തവണയും ജില്ല കലക്ടര്‍ ബി. അബ്​ദുല്‍ നാസറിന് അവർ പണം നേരിട്ട്​ കൈമാറി. ബാക്കി വന്ന തുകയില്‍നിന്ന് ബുദ്ധിമുട്ടനുഭവിക്കുന്ന 30 കുടുംബങ്ങള്‍ക്ക് അഞ്ചുകിലോ വീതം അരിയും സാമ്പത്തികസഹായവും നല്‍കുമെന്ന്​ സുബൈദ അറിയിച്ചു.

സംസ്ഥാനത്തെ വാക്‌സിന്‍ക്ഷാമം സംബന്ധിച്ച വാര്‍ത്ത കേള്‍ക്കാനിടയായതാണ് തുക നല്‍കാന്‍ തീരുമാനിച്ചതിന്​ പിന്നിലെന്ന്​ സുബൈദ പറഞ്ഞു. പള്ളിത്തോട്ടം പൊലീസ് സ്​റ്റേഷന് സമീപം ചായക്കട നടത്തുകയാണ്​ അവർ. ഹൃദ്രോഗിയായ ഭര്‍ത്താവ് അബ്​ദുല്‍ സലാമിനും സഹോദരനുമൊപ്പം ചായക്കടയില്‍നിന്ന് ലഭിക്കുന്ന വരുമാനം കൊണ്ടാണ് കുടുംബം ജീവിതം തള്ളിനീക്കുന്നത്.