ഉമ്മന് ചാണ്ടി സര്ക്കാരിന്റെ കാലത്തെ കുറഞ്ഞ തുകക്കുള്ള വൈദ്യുത കരാര് റദ്ദാക്കിയതിന് പിന്നില് സര്ക്കാരും റെഗുലേറ്ററി കമീഷനുമെന്ന് വി.ഡി. സതീശൻ
text_fieldsകൊച്ചി: ഉമ്മന് ചാണ്ടി സര്ക്കാരിന്റെ കാലത്തെ കുറഞ്ഞ തുകക്കുള്ള വൈദ്യുത കരാര് റദ്ദാക്കിയതിന് പിന്നില് സര്ക്കാരും റെഗുലേറ്ററി കമീഷനുമെന്ന് പ്രതിപക്ഷ നേതാവ് വി.ഡി. സതീശൻ. ഉമ്മന് ചാണ്ടി സര്ക്കാരിന്റെ കാലത്ത് 2014 ല് യൂനിറ്റിന് നാല് രൂപ 29 പൈസക്ക് 25 വര്ഷത്തേക്ക് വൈദ്യുതി വാങ്ങാനുണ്ടാക്കിയ കരാര് റദ്ദാക്കിയതിലൂടെ കോടിക്കണക്കിന് രൂപയുടെ നഷ്ടമാണ് സര്ക്കാരും വൈദ്യുതി ബോര്ഡും ഉണ്ടാക്കിയതെന്നും അദ്ദേഹം മാധ്യമങ്ങളോട് പറഞ്ഞു.
ഉമ്മന് ചാണ്ടി സര്ക്കാരും തുടര്ന്ന് വന്ന പിണറായി വിജയന് സര്ക്കാരും ഈ കരാര് പ്രകാരം വൈദ്യുതി വാങ്ങി. 2023-ല് 9 വര്ഷം കഴിഞ്ഞപ്പോള് പെട്ടന്നൊരു ബോധോദയം ഉണ്ടായതു പോലെയാണ് സര്ക്കാരും റെഗുലേറ്ററി കമീഷനും ഗൂഡോലോചന നടത്തി ആ കരാര് റദ്ദാക്കിയത്. അതിന് ശേഷം നാല് രൂപ 29 പൈസക്ക് കിട്ടിയിരുന്ന വൈദ്യുതി എട്ട് മുതല് 12 രൂപ വരെ നല്കിയാണ് വാങ്ങിക്കൊണ്ടിരിക്കുന്നത്. ഇതിലൂടെ ദിവസേന പത്ത് മുതല് 15 കോടി രൂപയുടെ നഷ്ടമാണ് ബോര്ഡ് വരുത്തിയത്. ഇതുവരെ 2000 കോടി രൂപയുടെയെങ്കിലും നഷ്ടമുണ്ടായിട്ടുണ്ട്. ഇക്കാര്യം പ്രതിപക്ഷം പുറത്ത് പറഞ്ഞപ്പോള് സര്ക്കാര് റെഗുലേറ്ററി കമ്മിഷനോട് ആവശ്യപ്പെടുകയും കരാര് പുനസ്ഥാപിക്കുകയും ചെയ്തു.
എന്നാല് കരാര് പുനസ്ഥാപിക്കാന് തയാറല്ലെന്ന നിലപാടാണ് കമ്പനികള് സ്വീകരിച്ചത്. ഇതേത്തുടര്ന്ന് വീണ്ടും ക്വട്ടേഷന് വിളിച്ചപ്പോള് നാല് രൂപ 29 പൈസക്ക് കിട്ടിയിരുന്ന വൈദ്യുതി ആറ് രൂപ 80 പൈസക്ക് തരാമെന്നാണ് അദാനി കമ്പനിയുടെ വാഗ്ദാനം. അപ്പലേറ്റ് ട്രിബ്യൂണലും കരാര് പുനസ്ഥാപിക്കുന്നത് വിസമ്മതിച്ചു. കരാര് റദ്ദാക്കിയതിനെ തുടര്ന്ന് ബോര്ഡിനുണ്ടായ നഷ്ടം നികത്താന് ഒരു വര്ഷത്തിനിടെ രണ്ടു തവണമായാണ് ചര്ജ് വര്ധിപ്പിച്ചത്.
വൈദ്യുതി മന്ത്രിയെ ഇരുട്ടില് നിര്ത്തി മുഖ്യമന്ത്രിയുടെ ഓഫീസ് നടത്തിയ അഴിമതിയുടെയും കൊള്ളയുടെയും നഷ്ടം ജനങ്ങളുടെ തലയില് കെട്ടിവയ്ക്കാനാണ് സര്ക്കാര് ശ്രമിക്കുന്നത്. റെഗുലേറ്ററി കമീഷനല്ലേ ചെയ്യേണ്ടതെന്നാണ് സര്ക്കാര് ഇപ്പോള് ചോദിക്കുന്നത്. ചെയര്മാന് പുറമെ രണ്ട് അംഗങ്ങളാണ് റെഗുലേറ്ററി കമീഷനിലുള്ളത്. വൈദ്യുതി ബോര്ഡിലെ ഇടത് അനുകൂല സംഘടനയുടെ പ്രസിഡന്റായിരുന്നയാളും എം.എം മണി വൈദ്യുതി മന്ത്രിയായിരുന്നപ്പോള് പി.എ ആയിരുന്ന ആളുമാണ് റെഗുലേറ്ററി കമീഷന് അംഗങ്ങള്. ഈ റെഗുലേറ്ററി കമീഷന് സര്ക്കാരുമായി ആലോചിക്കാതെ കരാര് റദ്ദാക്കുമോ? സര്ക്കാരിനും മീതെയാണ് റെഗുലേറ്ററി കമീഷനെങ്കില് കരാര് റദ്ദാക്കി ആറു മാസം കഴിഞ്ഞപ്പോള് സര്ക്കാര് ആവശ്യപ്പെട്ടതനുസരിച്ച് കരാര് പുനസ്ഥാപിക്കണമെന്ന് കമ്പനികളോട് റെഗുലേറ്ററി കമ്മിഷന് നിര്ദ്ദേശിച്ചതെന്തിന്?
കരാര് റദ്ദാക്കിയതിലൂടെ ബോര്ഡിനുണ്ടായ നഷ്ടം മുഴുവന് സാധാരണക്കാരുടെ തലയില് കെട്ടിവക്കാനുള്ള ശ്രമം അംഗീകരിക്കാനാകില്ല. ജനങ്ങള്ക്കൊപ്പം നിന്ന് സര്ക്കാരിന്റെ അഴിമതിക്കും കെടുകാര്യസ്ഥതക്കും എതിരെ പോരാടും. 25 വര്ഷത്തേക്കുണ്ടാക്കിയ കരാര് ഒമ്പത് വര്ഷത്തിന് ശേഷം റദ്ദാക്കിയതിലൂടെ ഉണ്ടായ കോടികളുടെ നഷ്ടത്തിന് ആരാണ് ഉത്തരവാദിയെന്ന് കണ്ടെത്തണം. ഇതിന്റെ പേരില് വൈദ്യുതി ചാര്ജ് വര്ധിപ്പിക്കാന് ഒരു കാരണവശാവും അനുവദിക്കില്ല -വി.ഡി. സതീശൻ പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.