വെറ്ററിനറി യൂനിവേഴ്സിറ്റി വൈസ് ചാൻസില​റെ സസ്പെൻഡ് ചെയ്ത് ഗവർണർ

തിരുവനന്തപുരം: പൂക്കോട്​ വെറ്ററിനറി കോളജ്​ വിദ്യാർഥി സിദ്ധാർഥി​ന്‍റെ മരണത്തിനിടയായ സംഭവങ്ങളിൽ ഗുരുതരമായ കൃത്യവിലോപം വരുത്തിയതിന്​ വെറ്ററിനറി സർവകലാശാല വൈസ്​ ചാൻസലർ ഡോ.എം.ആർ. ശശീന്ദ്രനാഥിനെ ചാൻസലറായ ഗവർണർ സസ്​പെൻഡ്​ ചെയ്​തു. സംഭവത്തിൽ വെറ്ററിനറി സർവകലാശാല നിയമ പ്രകാരം ജുഡീഷ്യൽ അന്വേഷണത്തിനും ഗവർണർ ഉത്തരവിട്ടു. അന്വേഷണത്തിന്​ സിറ്റിങ്​ ജഡ്​ജിയെ വിട്ടുതരാൻ അഭ്യർഥിച്ച്​ ഹൈകോടതി രജിസ്​ട്രാർക്ക്​ രാജ്​ഭവൻ കത്തും നൽകി. വെറ്ററിനറി സർവകലാശാല മുൻ പ്രഫസർ ഡോ.പി.സി. ശശീന്ദ്രന്​ വൈസ്​ ചാൻസലറുടെ ചുമതല നൽകിയും ഗവർണർ ഉത്തരവിറക്കി.

വൈസ് ​ചാൻസലർമാർക്കെതിരെ സസ്​പെൻഷൻ നടപടി അത്യപൂർവ സംഭവമാണ്​. പതിവിൽനിന്ന്​ വ്യത്യസ്​തമായി രാജ്​ഭവൻ സെക്രട്ടറിക്ക്​ പകരം ചാൻസലറായ ഗവർണർ ആരിഫ്​ മുഹമ്മദ്​ ഖാൻതന്നെ ഒപ്പിട്ടാണ്​ വി.സിയുടെ സസ്​പെൻഷൻ ഉത്തരവിറക്കിയത്​. വിദ്യാർഥിയുടെ മരണത്തിൽ ഡീൻ ഉൾപ്പെടെയുള്ളവരെ സംരക്ഷിക്കാൻ സർവകലാശാല തലപ്പത്തുള്ളവരും സർക്കാറും ശ്രമിക്കുന്നെന്ന ആരോപണം ശക്തിപ്പെടുന്നതിനിടെയാണ്​ വി.സിയെ സസ്​പെൻഡ്​​ ചെയ്​തത്​. ഇത്​ സർക്കാറിനും കനത്തതിരിച്ചടിയായി മാറി.

സിദ്ധാർഥി​ന്‍റെ മരണത്തിലേക്ക്​ നയിച്ച സംഭവങ്ങളിൽ​ ഗവർണർ വൈസ്​ ചാൻസലർ ശശീന്ദ്രനാഥിൽനിന്ന്​ റിപ്പോർട്ട്​ തേടുകയും കഴിഞ്ഞ ദിവസം വിദ്യാർഥിയുടെ കുടുംബത്തെ സന്ദർശിക്കുകയും ചെയ്​തിരുന്നു. കോളജിലുണ്ടായ സംഭവത്തിൽ ചുമതലകളും ഉത്തരവാദിത്വവും നിർവഹിക്കുന്നതിൽ വി.സി ഗുരുതരവും നിർദയവുമായ വീഴ്​ചയും കൃത്യവി​ലോപവും നടത്തിയെന്ന്​ വി.സിയുടെതന്നെ റിപ്പോർട്ട്​ ഉദ്ധരിച്ച്​ സസ്​പെൻഷൻ ഉത്തരവിൽ ഗവർണർ ചൂണ്ടിക്കാട്ടുന്നു.

കാമ്പസിൽ ​ഐക്യമുള്ള അന്തരീക്ഷം ഒരുക്കുന്നതിലും നിയമാനുസൃതം കാര്യങ്ങൾ നിർവഹിക്കുന്നതിലും വൈസ്​ചാൻസലറുടെ നേതൃത്വം നിയന്ത്രിക്കാനാവാത്ത വിധം താഴെ​പോയത്​ അശുഭ സൂചനയാണെന്നും ഗവർണറുടെ ഉത്തരവിൽ പറയുന്നു. ഇത്തരം ഘട്ടത്തിൽ ‘അപൂർവങ്ങളിൽ അപൂർവമായ’ തരത്തിലുള്ള നടപടിയുടെ അഭാവം നീതിയുടെ ഗതിയെതന്നെ തടസ്സപ്പെടുത്തും.

ഈ സാഹചര്യത്തിൽ സർവകലാശാല നിയമപ്രകാരമുള്ള മാതൃകാപരമായ നടപടിയും വിശദമായ അന്വേഷണവും ആവശ്യമാണെന്നും അതിനാൽ വൈസ്​ ചാൻസലറെ സസ്​പെൻഡ്​ ചെയ്യാനും ഹൈകോടതി ജഡ്​ജി തലത്തിലുള്ള അന്വേഷണത്തിനും ഉത്തരവിടുന്നെന്നും ഗവർണറുടെ ഉത്തരവിൽ പറയുന്നു. സസ്​പെഷൻ കാലയളവിൽ വി.സിക്ക്​ നിയമപ്രകാരമുള്ള അലവൻസുകൾക്ക്​ അർഹതയുണ്ടായിരിക്കും.