ക്രിമിനൽ കേസും തടവറയും മുന്നിൽകണ്ട്​ അധ്യാപകർക്ക്​ ജോലി ചെയ്യേണ്ട അവസ്ഥയെന്ന്​ ഹൈകോടതി

കൊച്ചി: സാ​ങ്കേതികവിദ്യ പുരോഗമിച്ച ഇക്കാലത്ത്​ ക്രിമിനൽ കേസും തടവറയും ഭയന്ന്​ കുട്ടികൾക്ക്​ ക്ലാസെടുക്കേണ്ട സ്ഥിതിയിലാണ്​ അധ്യാപകരെന്ന്​ ഹൈകോടതി. എന്ത്​​ ചെയ്യണം, ചെയ്യേണ്ട എന്ന ഭയമാണവർക്ക്​.

അധ്യാപകരെ ബഹുമാനിക്കാത്ത ദുസ്വഭാവം ചില കുട്ടികൾ സ്ഥിരമായി പുലർത്തുന്നു. സ്ഥാപനത്തിന്‍റെ അച്ചടക്കത്തിന്‍റെയും പഠനത്തിന്‍റെയും ഭാഗമായി നൽകുന്ന നിർദേശങ്ങളെയും ശിക്ഷകളെയും അധ്യാപകരെ തുറുങ്കിലാക്കാനുള്ള ക്രിമിനൽ കേസിന്​ അവസരമായി കുട്ടികൾ മാറ്റുന്നു. ഇത്​ വിദ്യാഭ്യാസ സ്ഥാപനത്തിന്‍റെ സുഗമമായ പ്രവർത്ത​നത്തിന്​ ഭീഷണിയാണെന്ന്​ മാത്രമല്ല, അപകടകരമായ പ്രത്യാഘാതങ്ങൾ ഉണ്ടാക്കുകയും ചെയ്യുന്നു. ഇതേ നില തുടരുകയാണെങ്കിൽ അച്ചടക്കമുള്ള പുതിയ തലമുറയെ എങ്ങനെ വാർത്തെടുക്കാനാവുമെന്ന്​ ജസ്റ്റിസ്​ എ. ബദറുദ്ദീൻ ചോദിച്ചു. ഏഴാം ക്ലാസ്​ വിദ്യാർഥിയെ ശിക്ഷിച്ചെന്ന പേരിൽ അധ്യാപികക്കെതിരെയെടുത്ത കേസിലെ തുടർനടപടികൾ റദ്ദാക്കിയാണ്​ സിംഗിൾ ബെഞ്ചിന്‍റെ നിരീക്ഷണം.

ഡെസ്കിൽ കാൽ കയറ്റിവെച്ച്​ ക്ലാസിലിരുന്നത്​​ ചോദ്യംചെയ്ത അധ്യാപികയെ വിദ്യാർഥി അസഭ്യം പറഞ്ഞതിനെത്തുടർന്ന്​ വടിയെടുത്ത്​ അടിച്ചിരുന്നു. എന്നാൽ, അടിച്ച്​ പരിക്കേൽപിച്ചെന്ന പേരിൽ കൊടുത്ത പരാതിയിൽ വാടാനപ്പള്ളി പൊലീസ്​ കേസെടുത്തു. തൃശൂർ അഡീ. സെഷൻസ്​ കോടതിയു​ടെ പരിഗണനയിലുള്ള കേസ്​ റദ്ദാക്കണമെന്നാവശ്യപ്പെട്ട്​ അധ്യാപിക കോടതിയെ സമീപിക്കുകയായിരുന്നു.

ദക്ഷിണയായി ഗുരു ചോദിച്ച പെരുവിരൽ മടിയില്ലാതെ മുറിച്ചുനൽകിയ ഏകലവ്യന്‍റെ കാലമുണ്ടായിരുന്നു. സാ​ങ്കേതികവിദ്യ പുരോഗമിച്ചപ്പോൾ അധ്യാപക-വിദ്യാർഥിബന്ധം കീഴ്​മേൽ മറിഞ്ഞതായി കോടതി അഭിപ്രായപ്പെട്ടു. ക്ലാസിൽ മര്യാദയോടെ ഇരിക്കാൻ പറഞ്ഞതിനാണ്​ വിദ്യാർഥി അധ്യാപികയെ അസഭ്യം പറഞ്ഞത്​. അതിനാണ്​​ കുട്ടിയെ ശിക്ഷിച്ചത്​. കുട്ടിക്ക്​ അനാവശ്യമായി മാനസിക-ശാരീരിക ബുദ്ധിമുട്ടുണ്ടാക്കാൻ അധ്യാപികയിൽനിന്ന്​ ബോധപൂർവ ശ്രമമുണ്ടായിട്ടില്ല. ശിക്ഷ മുറിവേൽപിക്കാനിടയാക്കിയിട്ടുമില്ല. അതിനാൽ, ഇതിന്‍റെ പേരിൽ​ ബാലനീതി നിയമപ്രകാരമടക്കമുള്ള കുറ്റകൃത്യം നിലനിൽക്കില്ലെന്ന്​ വ്യക്തമാക്കിയ കോടതി, ​കേസിലെ തുടർനടപടികൾ റദ്ദാക്കുകയായിരുന്നു.