ഇടതുമുന്നണി ചരിത്രവിജയം നേടും -എം.വി. ഗോവിന്ദൻ; മത്സരം എൽ.ഡി.എഫും യു.ഡി.എഫും തമ്മിലെന്ന്

തിരുവനന്തപുരം: ഇടതുമുന്നണി ചരിത്രം വിജയം നേടുമെന്നാവർത്തിച്ച്​ സി.പി.​എം സംസ്ഥാന സെക്രട്ടറി എം.വി. ഗോവിന്ദൻ. കേരളത്തിൽ മത്സരം എൽ.ഡി.എഫും യു.ഡി.എഫും തമ്മിലാണ്​. ബി.ജെ.പി മൂന്നാം സ്ഥാനത്തേക്ക്​ പിന്തള്ളപ്പെടും. കോൺഗ്രസ്​ മൃദുഹിന്ദുത്വ നിലപാടിനോട്​ ഐക്യപ്പെടുകയാണെന്നും പ്രകടനപത്രികയിൽ സി.എ.എ ഉൾപ്പെടാത്തത്​ ഇതിന്‍റെ തെളിവാണെന്നും എം.വി. ഗോവിന്ദൻ വാർത്തസമ്മേളനത്തിൽ ആരോപിച്ചു.

പച്ചക്കൊടി വരുമോ എന്ന്​ കണ്ട്​ ത്രിവർണക്കൊടി ഒഴിവാക്കിയാണ്​ കോൺഗ്രസിന്‍റെ പ്രചാരണം. ഇടതുപക്ഷത്തെയല്ലാതെ നാളെ ബി.ജെ.പിയാകാൻ കച്ചകെട്ടുന്ന കോൺഗ്രസിനെ വിജയിപ്പിക്കാനാകില്ലെന്ന്​ ​​ജനങ്ങൾക്ക്​ ബോധ്യപ്പെട്ടിട്ടുണ്ട്​. ബി.ജെ.പി ഒരു സീറ്റും നേടില്ല. വിജയിക്കുകയോ രണ്ടാം സ്ഥാനത്ത്​ വരികയോ ചെയ്യാത്തവിധം ബി.ജെ.പി മൂന്നാം സ്ഥാനത്തേക്ക്​ തള്ളപ്പെടും. നേമത്ത്​ അക്കൗണ്ട്​ പൂട്ടിച്ച​തുപോലെ ഒരു സീറ്റിലും രണ്ടാം സ്ഥാനത്തെത്താത്ത രീതിയിൽ ബി.ജെ.പിയെ തളക്കാനാകുമെന്നതും പ്രധാനമാണ്​. മാധ്യമങ്ങൾ ഇടതുമു​ന്നണിയുടെ വിജയം ​പ്രതിഫലിപ്പിക്കാതിരിക്കുന്നത്​ ഉൾഭയം കൊണ്ടാണ്​. ബൂത്ത്​ കേന്ദ്രീകരിച്ചായിരുന്നു ഇടതുമുന്നണിയുടെ പ്രചാരണ സംവിധാനം. പരാജയം മണത്ത്​ ബി.ജെ.പിയും കോൺഗ്രസും പണവും മദ്യവും ഒഴുക്കുകയാണ്​. പാവ​​പ്പെട്ടവന്‍റെ വോട്ടിന്​ വില നിശ്ചയിക്കുകയാണെന്നും അദ്ദേഹം വാർത്തസമ്മേളനത്തിൽ പറഞ്ഞു.

ശൈലജക്കെതിരായ അശ്ലീല പ്രചാരണം ആസൂത്രിതം

കെ.കെ. ശൈലജക്കെതിരായ അശ്ലീല പ്രചാരണം യു.ഡി.എഫ്​ ആസൂത്രണം ചെയ്ത്​ നടപ്പാക്കുന്നതാണ്​. മോർഫ്​ ചെയ്​ത ചിത്രങ്ങളും എഡിറ്റ്​ ചെയ്ത വിഡിയോകളുമുൾപ്പെടെ കുടുംബഗ്രൂപ്പുകളിലേക്കയച്ച യു.ഡി.എഫിന്‍റെ അശ്ലീല സംഘത്തെ പുകഴ്​ത്താനാണ്​ ​പ്രതിപക്ഷ നേതാവും ഷാഫി പറമ്പിലും തയാറായിട്ടുള്ളത്​. കേരളത്തിൽ ജയിക്കുന്ന ആദ്യ സ്ഥാനാർഥിയും ശൈലജയായിരിക്കും.

പ്രധാനമന്ത്രിയുടേത്​ കലാപാഹ്വാനം

മുസ്​ലിം മതവിഭാഗത്തിനെതിരായ വർഗീയ കലാപം സംഘടിപ്പിക്കാനുതകുന്ന മതഭ്രാന്താണ്​ പ്രധാനമന്ത്രി മുന്നോട്ടുവെച്ചത്​. പച്ചയായ വർഗീയത പറയുന്ന ​പ്രവണതക്ക്​ സമനില തെറ്റിയെന്നല്ലാതെ മറ്റൊന്നും പറയാനാകില്ല. വർഗീയ കലാപത്തിനുള്ള ആഹ്വാനമാണിത്​.

ജയിക്കാൻ പോകുന്നില്ലെന്ന തോന്നലാണ്​ ഇതിന്​ കാരണം. മതവിദ്വേഷം പ്രചരിപ്പിക്കുന്ന പ്രധാനമന്ത്രിക്കെതിരായി പാർട്ടികൾ പരാതി നൽകിയിട്ടും തെ​രഞ്ഞെടുപ്പ്​ കമീഷൻ കണ്ടതേയില്ല. ഇലക്ഷൻ കമീഷൻ മോദിയും മോദിയുടെ അസിസ്റ്റന്‍റ്​ മ​ന്ത്രിയും ചേർന്ന്​ തീരുമാനിച്ചവരാണ്​. കേരള സ്​റ്റോറി പ്രദർശിപ്പിച്ച ഘട്ടത്തിലും ഇതേ നിസ്സംഗത തന്നെയാണ്​ പ്രകടിപ്പിച്ചത്​. ഭരണഘടന സ്ഥാപനങ്ങളെല്ലാം ആർ.എസ്​.എസിന്‍റെ നിയന്ത്രണത്തിലാക്കിയതിന്‍റെ ഫലങ്ങളാണ്​ കാണുന്നത്​.

രാഹുലിന്‍റെ ആവശ്യം രാഷ്ട്രീയ അപക്വത

മുഖ്യമന്ത്രിയെ അറസ്റ്റ്​​ ചെയ്യണമെന്ന രാഹുൽ ഗാന്ധിയുടെ ആവശ്യം പ്രധാനമന്ത്രിയുടെ ആവശ്യ​ത്തിന്‍റെ മറ്റൊരു പതിപ്പാണ്​​. പ്രതിപക്ഷ ഐക്യനിരയിലെ നേതാക്കൾക്കെതിരെ നിലപാട്​ കടുപ്പിക്കുന്ന ഏജൻസിക​ളെ വെള്ള പൂശു​ന്നതിനുള്ള ഇടപെടലാണ്​ രാഹുൽ സ്വീകരിക്കുന്നതെന്നും ഗോവിന്ദൻ കൂട്ടിച്ചേർത്തു.