ബിജുവിന്റെ പേരിലെ ഫണ്ടിൽ തട്ടിപ്പ് നടത്തിയെന്ന വാർത്ത വ്യാജം; പരാതി ലഭിച്ചിട്ടില്ല -ഡി.വൈ.എഫ്.ഐ

തിരുവനന്തപുരം: വിദ്യാർഥി സംഘടന നേതാവായിരുന്ന പി. ബിജു സ്മാരക മന്ദിരത്തിനുവേണ്ടി പിരിച്ച തുകയിൽ വെട്ടിപ്പ്​ നടന്നെന്ന ചാനൽ വാർത്തകൾ തള്ളി ഡി.വൈ.എഫ്​.ഐ ജില്ല നേതൃത്വം. മെഡിക്കൽ കോളജിലെത്തുന്ന രോഗികൾക്കും കൂട്ടിരിപ്പുകാർക്കും സഹായത്തിനായാണ്​ അവിടം കേന്ദ്രീകരിച്ച്​ പി. ബിജു റെഡ്​ കെയർ ഓർമ മന്ദിരം പണിയുന്നത്​.

ഇതിന്‍റെ നിർമാണത്തിന്​ പാളയം ബ്ലോക്ക്​ കമ്മിറ്റി പിരിച്ച തുക ജില്ല വൈസ്​ പ്രസിഡന്‍റ്​ സ്വന്തം അക്കൗണ്ടിൽ നിക്ഷേപിച്ചെന്നാണ്​ വാർത്ത​. ഇതുസംബന്ധിച്ച്​ സി.പി.എം ജില്ല നേതൃത്വത്തിന്​ പരാതി നൽകിയതിനു​ പിന്നാലെ സി.പി.എം പാളയം ഏരിയ കമ്മിറ്റി ഫ്രാക്ഷൻ ​യോഗം ചേരുംമുമ്പ്​ വൈസ്​ പ്രസിഡന്‍റ്​ ഒന്നര ലക്ഷം രൂപ തിരിച്ചടച്ചുവെന്നും ആക്ഷേപമുയർന്നു.

എന്നാൽ, ഫണ്ട്​ തട്ടിപ്പ്​ വാർത്ത വ്യാജമാണെന്ന്​ ഡി.വൈ.എഫ്​.ഐ ജില്ല സെക്രട്ടറി ഷിജുഖാൻ വാർത്തസമ്മേളനത്തിൽ പറഞ്ഞു. ഇക്കാര്യത്തിൽ ജില്ല-സംസ്ഥാന നേതൃത്വങ്ങൾക്ക്​ ഇതുവരെ പരാതി ലഭിച്ചിട്ടില്ല. ഇല്ലാത്ത തട്ടിപ്പിന്‍റെ കണക്കുകൾ എങ്ങനെയാണ്​ വിശദീകരിക്കുക. മന്ദിരനിർമാണത്തിന്​ സംഭാവന ഇനത്തിൽ പൊതുജനങ്ങളിൽനിന്ന്​ പണം പിരിച്ചിട്ടില്ല.

തലസ്ഥാന ജില്ലയിലെ ഡി.വൈ.എഫ്​.ഐ പ്രവർത്തകർ ഒരു ദിവസം മാറ്റിവെച്ച്​ തൊഴിൽ ചെയ്​തും ചലഞ്ചിലൂടെ സാധനങ്ങൾ വിറ്റഴിച്ചും യൗവനത്തിന്‍റെ പുസ്തകം എന്ന കൃതി വിറ്റും ലഭിച്ച വരുമാനമാണ്​ ഓർമമന്ദിരം പണിയാൻ ചെലവാക്കുന്നത്. ബ്ലോക്ക്​ കമ്മിറ്റികളും ജില്ല കമ്മിറ്റിയും നൽകിയ തുകയുടെയും കണക്കുകൾ സംഘടനയുടെ പക്കലുണ്ട്​. അതു കൃത്യസമയത്ത്​​ പൊതുസമൂഹത്തെ ബോധ്യപ്പെടുത്തുമെന്നും അദ്ദേഹം പറഞ്ഞു. ജില്ല പ്രസിഡന്‍റ്​ വി. അനൂപും വാർത്തസമ്മേളനത്തിൽ പ​ങ്കെടുത്തു.