മകളെ പീഡിപ്പിച്ചയാൾക്ക്​ 98 വർഷം കഠിനതടവും അഞ്ചു ലക്ഷം പിഴയും

പത്തനംതിട്ട: 11കാരിയായ മകളെ അശ്ലീല വിഡിയോകൾ മൊബൈലിൽ കാണിക്കുകയും ലൈംഗികമായി പീഡിപ്പിക്കുകയും ചെയ്ത കേസിൽ മാന്നാർ സ്വദേശിയായ 50കാരനായ പിതാവിന്​ 98 വർഷം കഠിനതടവും 5.25 ലക്ഷം രൂപ പിഴയും ശിക്ഷ. പിഴത്തുക കുട്ടിക്ക് നൽകണം.

പിഴ ഒടുക്കാതിരുന്നാൽ അഞ്ചു വർഷം അധിക കഠിനതടവ്​ അനുഭവിക്കണം. ഒരുമിച്ച് 25 വർഷം കഠിനതടവ് അനുഭവിച്ചാൽ മതി. പത്തനംതിട്ട പോക്സോ അതിവേഗ കോടതി ജഡ്ജി ഡോണി തോമസ് വർഗീസാണ്​ വിധി പുറപ്പെടുവിച്ചത്​.

2019 മുതൽ 2022 വരെ വിവിധ സമയങ്ങളിൽ സ്വന്തംവീട്ടിൽ വെച്ചാണ്​ ഉപദ്രവിച്ചത്​. ജോലിക്കാരിയായ മാതാവും മറ്റാരും ഇല്ലാത്ത സമയങ്ങളിലായിരുന്നു അതിക്രമം. ആരോടെങ്കിലും പറഞ്ഞാൽ തന്നോടൊപ്പം കേസിൽപെട്ട്​ ജയിലിലാകുമെന്ന്​ പറഞ്ഞ് കുട്ടിയെ ഭയപ്പെടുത്തി. അതിക്രമം നേരിട്ടുകണ്ട അയൽവാസിയായ വീട്ടമ്മ, സംഭവം ​മാതാവിനോട്​ പറയുകയും തുടർന്ന്​ വിവരം റാന്നി പൊലീസിൽ അറിയിക്കുകയുമായിരുന്നു.

മുമ്പ്​ വിവാഹിതനാണെന്ന വിവരം മറച്ചുവെച്ച് പെൺകുട്ടിയുടെ മാതാവിനെ ഇയാൾ വിവാഹം കഴിക്കുകയായിരുന്നു. ആദ്യ വിവാഹത്തിൽ പ്രതിക്ക്​ മൂന്ന്​ കുട്ടികളുണ്ട്. രണ്ടാം വിവാഹത്തിലെ രണ്ട്​ കുട്ടികളിൽ മൂത്തയാളാണ്​ പീഡനത്തിനിരയായത്. കേസ് രജിസ്റ്റർ ചെയ്ത സമയത്ത് പെൺകുട്ടി വിവരങ്ങൾ കൈമാറാൻ മടിച്ചു.

കൗൺസലിങ്ങിലൂടെയും മെഡിക്കൽ പരിശോധനയിലൂടെയുമാണ്​ ക്രൂരമായ ലൈംഗിക പീഡനം വ്യക്തമായത്​. പിതാവിന്‍റെ പീഡനത്തിൽ മനംനൊന്ത് പെൺകുട്ടി ആത്മഹത്യശ്രമവും നടത്തിയിരുന്നു.