ജാമ്യവ്യവസ്ഥയിൽ ഇളവ് തേടി​ രാഹുൽ മാങ്കൂട്ടത്തിൽ; എതി‍ർത്ത്​ പൊലീസ്​

തിരുവനന്തപുരം: പാലക്കാട്​ ഉപതെരഞ്ഞെടുപ്പിലെ യു.ഡി.എഫ്​ സ്ഥാനാർഥി രാഹുൽ മാങ്കൂട്ടത്തിലിന്​ ജാമ്യവ്യവസ്ഥയിൽ ഇളവ്​ നൽകരുതെന്ന്​ പൊലീസ്​ റിപ്പോർട്ട്​. എല്ലാ തിങ്കളാഴ്ചയും തിരുവനന്തപുരം മ്യൂസിയം പൊലീസ് സ്റ്റേഷനിൽ നേരിട്ടെത്തി ഒപ്പിടണമെന്ന ജാമ്യവ്യവസ്ഥയിലാണ്​ രാഹുൽ ഇളവ് തേടിയത്.

ഒക്​​ടോബർ എട്ടിന്​ പ്രതിപക്ഷ യുവജന സംഘടനകൾ നടത്തിയ നിയമസഭ മാർച്ചിനെ തുടർന്ന്​ മ്യൂസിയം പൊലീസ്​ രജിസ്റ്റർ ചെയ്ത കേസിൽ ജാമ്യത്തിലാണ്​ രാഹുൽ. റിമാൻഡ് സമയത്ത് 29-ാം പ്രതിയായിരുന്ന രാഹുലിനെ ഒന്നാം പ്രതിയാക്കി​ പൊലീസ്​ കോടതിയിൽ പുതിയ റിപ്പോർട്ട് സമർപ്പിക്കുകയായിരുന്നു​.

സ്ഥാനാർഥിയെന്ന നിലക്കാണ് രാഹുൽ മാങ്കൂട്ടത്തിൽ ഹരജി നൽകിയത്. ഇതിനെ എതി‍ർത്ത പൊലീസ്, ഇളവ് നൽകിയാൽ സമൂഹത്തിന് തെറ്റായ സന്ദേശം നൽകുമെന്ന് കോടതിയിൽ റിപ്പോർട്ട്​ സമർപ്പിച്ചു. പൂരം കലക്കൽ ഗൂഢാലോചനക്കെതിരെയാണ് സമരം ചെയ്തതെന്നും തന്നെ സ്ഥിരം കുറ്റവാളിയെന്ന് പൊലീസ് വിളിക്കുന്നത് എന്തു കൊണ്ടാണെന്നും രാഹുൽ മാങ്കൂട്ടത്തിൽ ചോദിച്ചു. രാഹുലിന്‍റെ അപേക്ഷയിൽ തിരുവനന്തപുരം സി.ജെ.എം കോടതി വ്യാഴാഴ്ച ഉത്തരവിടും.

നേരത്തേ, പി.വി. അൻവറിന്‍റെ വെളിപ്പെടുത്തലിന്‍റെ പശ്​ചാത്തലത്തിൽ മുഖ്യമന്ത്രി രാജിവെക്കണമെന്ന് ആവശ്യപ്പെട്ട്​ നടത്തിയ സെക്രട്ടേറിയറ്റ്​ മാർച്ചിന്‍റെ പേരിൽ കന്‍റോൺമെന്‍റ്​ പൊലീസ്​ രജിസ്റ്റർ ചെയ്ത കേസിൽ കർശന ഉപാധിക​ളോടെയായിരുന്നു രാഹുലിന്​ ജാമ്യം അനുവദിച്ചത്​.