ബി.എസ്​.എൻ.എല്ലിന്​ ‘മഹാമറവി’; ജിയോയിൽനിന്ന്​ കിട്ടേണ്ട 1757.56 കോടി വന്നില്ല

തൃശൂർ: മുകേഷ്​ അംബാനിയുടെ റിലയൻസ്​ ജിയോ ഇൻഫോകോം ലിമിറ്റഡ്​ ബി.എസ്​.എൻ.എല്ലിന്‍റെ പശ്ചാത്തല-സാ​ങ്കേതിക സംവിധാനം ഉപയോഗിക്കുന്നതിന്​ നൽകേണ്ട തുക അടച്ചിട്ട് 10 വർഷം. കരാർപ്രകാരമുള്ള തുക ഈടാക്കാൻ ബിൽ അയക്കാൻ ബി.എസ്​.എൻ.എൽ ‘മറന്നതാണ്​’ കാരണം! ഇതുവഴി ബി.എസ്​.എൻ.എല്ലിന്​ നഷ്ടം 1757.56 കോടി രൂപ. കംട്രോളർ ആൻഡ്​ ഓഡിറ്റർ ജനറലിന്‍റെ റിപ്പോർട്ടാണ് ഈ ‘മഹാമറവി’ വെളിച്ചത്തുകൊണ്ടുവന്നത്​.

ബി.എസ്​.എൻ.എല്ലിന്‍റെ പശ്ചാത്തല സംവിധാനങ്ങൾ ഉപയോഗിക്കാൻ രണ്ടു​ സ്ഥാപനങ്ങളും തമ്മിൽ ധാരണയുണ്ടാക്കിയിരുന്നു. ഈ ‘മാസ്റ്റർ സർവിസ്​ എഗ്രിമെന്‍റ്​ പ്രകാരം’ ലഭിക്കേണ്ട തുകയാണ്​ ബി.എസ്.എൻ.എല്ലിന് നഷ്ടമായത്​. ഇത്രയും തുകയും അതിന്‍റെ പലിശയും കൂടാതെ മറ്റുചില സേവനങ്ങൾക്ക് കിട്ടേണ്ട ഏതാനും കോടികൾ കൂടിയും ജിയോയിൽനിന്ന്​ ബി.എസ്​.എൻ.എല്ലിന്​ ലഭിച്ചില്ലെന്ന്​ റിപ്പോർട്ടിൽ പറയുന്നു. 2014 മേയ്​ മുതൽ 2024 മാർച്ച്​ വരെ ബി.എസ്​.എൻ.എൽ ‘മറവി’യിലായിരുന്നു.

സി.എ.ജി റിപ്പോർട്ടിൽ പൊതുമേഖല സ്ഥാപനങ്ങളുടെ സാമ്പത്തിക പ്രകടനം സംബന്ധിച്ച പരിശോധനയിലാണ്​ ഇക്കാര്യം പറയുന്നത്​. പല സ്ഥാപനങ്ങളുടെയും വീഴ്ചകൾ സംബന്ധിച്ച ചോദ്യങ്ങൾക്ക്​ ബന്ധപ്പെട്ട വകുപ്പുകളോ മന്ത്രാലയങ്ങളോ കൃത്യമായി മറുപടി നൽകിയിട്ടില്ല.