ഉയരം വെറും 40.50 സെന്‍റിമീറ്റർ; ലോകത്തിലെ ഏറ്റവും ചെറിയ ആട് ഇടുക്കിക്കാരി 'കറുമ്പി', ഗിന്നസ് വേൾഡ് റെക്കോഡ് സമ്മാനിച്ചു

പീരുമേട്: ലോകത്തിലെ ഏറ്റവും ചെറിയ പ്രസവിച്ച ആടെന്ന പദവി സ്വന്തമാക്കി ഇടുക്കിക്കാരിയായ കറുമ്പിയെന്ന കുഞ്ഞനാട്​. കനേഡിയൻ പിഗ്​മി ഇനത്തിൽപെട്ട ഈ പെണ്ണാടിന്​ ഉയരം വെറും 40.50 സെന്‍റിമീറ്റർ (1.3 അടി) മാത്രം​.

പീരുമേട്​ പള്ളിക്കു​ന്നിലെ ലെനു പീറ്ററിന്‍റെ ഫാമിൽ നാല്​ വർഷം മുമ്പാണ്​ കറുമ്പി ജനിക്കുന്നത്​. പിഗ്​മി ഇനത്തിൽപെട്ട ആടുകൾക്ക്​ പൊതുവെ ഉയരക്കുറവാണെങ്കിലും കറുമ്പി ആട്​ പ്രായം കൂടുംതോറും കുഞ്ഞനായി തുടർന്നു. മാസങ്ങൾക്കുമുമ്പ്​​ പ്രസവിക്കുകയും ചെയ്തു. കുഞ്ഞാടും കറുമ്പിയോളം എത്തിയിട്ടുണ്ട്​. ഈ സമയത്താണ്​ ലോക നേട്ടത്തിനുള്ള സാധ്യതയുണ്ടെന്ന് ലെനു പീറ്റർ തിരിച്ചറിഞ്ഞത്. ഫാം സന്ദർശിച്ച വിദേശിയാണ്​ ഇത്​ ആദ്യം പറഞ്ഞത്​.

ലിനു 15 വർഷം മുമ്പാണ് കനേഡിയൻ പിഗ്മി ഇനത്തിലുള്ള ഒരു ജോടി ആടുകളെ വാങ്ങിയത്. ഇപ്പോൾ മൂന്ന്​ ആൺ ആടും അഞ്ച്​ പെൺ ആടും 20 കുഞ്ഞുങ്ങളും ഉണ്ട്. മൂന്ന് നിറങ്ങളിലാണ് ആടുകൾ. കനേഡിയൻ പിഗ്മിയുടെ വംശഗുണം നിലനിർത്താൻ ഓരോ തവണയും ഓരോ ആണാടിനെ ഉപയോഗിച്ചാണ്​ ഇണചേർക്കുന്നത്​.

മൃഗസംരക്ഷണ വകുപ്പിലെ ഡോക്ടറും സഹായികളുമാണ് ആടിന്‍റെ പ്രായം, ബ്രീഡ്, അളവുകൾ എല്ലാം രേഖപ്പെടുത്തി ഗിന്നസ് വേൾഡ് റെക്കോഡിനായി അയച്ചത്​. വിശദമായ വിലയിരുത്തലിനുശേഷം ഒരാഴ്ച മുമ്പ്​ റെക്കോഡ് ലഭിച്ചെന്ന്​ അധികൃതർ അറിയിക്കുകയായിരുന്നു. യൂനിവേഴ്സൽ റെക്കോഡ് ഫോറം വേൾഡ് റെക്കോഡിലും കറുമ്പി ഇടംപിടിച്ചിട്ടുണ്ട്. കറുമ്പിക്കായുള്ള ഗിന്നസ് വേൾഡ് റെക്കോഡ് ഫലകം ലെനുവിന് സമ്മാനിച്ചു. സ്വകാര്യ എൻജിനീയറിങ്​ കോളജിലെ മെക്കാനിക്കൽ ഇൻസ്ട്രക്ടറാണ് ലെനു.