കടലിൽ കുളിക്കാൻ ഇറങ്ങിയ വിദ്യാർഥിയെ കാണാതായി

തളിക്കുളം: തൃശ്ശൂർ തമ്പാൻകടവ് ബീച്ചിൽ കുളിക്കാനിറങ്ങിയ വിദ്യാർഥിയെ കാണാതായി. എടമുട്ടം സ്വദേശി അസ്‌ലമി (16) നെയാണ് കാണാതായത്. തളിക്കുളം കൈതക്കലിലുള്ള ഓർഫനേജിലെ വിദ്യാർഥിയാണ് അസ്‌ലം.

ഇരുപതോളം കുട്ടികളടങ്ങുന്ന സംഘമാണ് രാവിലെ എട്ട് മണിയോടെ കടപ്പുറത്ത് എത്തിയത്. അസ്‌ലമും കൂട്ടുകാരൻ സവാദുമാണ് കടലിൽ ഇറങ്ങിയത്. കടലിൽ മുങ്ങിത്താഴുന്നത് കണ്ട് സമീപത്തുണ്ടായിരുന്ന മത്സ്യത്തൊഴിലാളികൾ ചേർന്ന് സവാദിനെ രക്ഷപ്പെടുത്തി വലപ്പാട് ദയ ആശുപത്രിയിൽ എത്തിച്ചു.

അസ്‌ലമിനായി അഗ്നിരക്ഷസേനയും പൊലീസും നാട്ടുകാരും തെരച്ചിൽ നടത്തുകയാണ്.