സർക്കാർ പണം നൽകിയില്ലെങ്കിൽ ബി.പി.എൽ​ സൗജന്യം തുടരാനാവില്ലെന്ന്​ ജല അതോറിറ്റി

തിരുവനന്തപുരം: പ്രതിമാസം 15 കിലോ ലിറ്ററിന്​ താഴെ ഉപ​ഭോഗമുള്ള ബി.പി.എൽ ഉപഭോക്താക്കൾക്ക്​ സൗജന്യമായ ജലവിതരണം നടത്തുന്ന രീതി തുടരാനാവി​ല്ലെന്ന്​ ജല അതോറിറ്റി. പ്രതിമാസം 10 മുതൽ 12 കോടി രൂപ വരെ അധികബാധ്യത ഉയരുന്ന സാഹചര്യത്തിൽ സർക്കാർ വിഹിതം നൽകാതെ മു​ന്നോട്ടുപോകാനാകില്ലെന്ന്​ ഡയറക്​ടർ ബോർഡ്​ യോഗം വിലയിരുത്തി. പണം ആവശ്യപ്പെട്ട്​ സർക്കാറിന്​ കത്ത്​ നൽകാൻ തീരുമാനിച്ചു.

ജല അതോറിറ്റിക്ക്​ സർക്കാറിൽനിന്ന്​ നോൺ പ്ലാൻ ഗ്രാൻറ്​ ​ ലഭിക്കുന്നില്ല. ബി.പി.എൽ സബ്​സിഡിക്ക്​ തുല്യമായ ഗ്രാൻറ്​ അനുവദിക്കുന്നതിനോ ​നോൺ പ്ലാൻ ഗ്രാൻറ്​ കൃത്യമായി നൽകാനോ സർക്കാറിനോട്​ ആവശ്യപ്പെടാനാണ്​ തീരുമാനം. അതേസമയം, മാരക രോഗമുള്ളവർ, ശാരീരികമായും മാനസികമായും ​വെല്ലുവിളി നേരിടുന്നവർ തുടങ്ങിയവർക്ക്​ പുതുക്കിയ വെള്ളക്കരത്തിൽ ഇളവ്​ നൽകുന്നതിനുള്ള അജണ്ടക്ക്​ ബോർഡ്​ അംഗീകാരം നൽകി.

40 ശതമാനമോ അതിൽകൂടു​തലോ ഓട്ടിസം ബാധിച്ച അംഗങ്ങളുള്ള കുടുംബം, 40 ശതമാനമോ അതിൽക്കൂടു​തലോ അംഗവൈകല്യം ബാധിച്ചവരുള്ള കുടുംബം എന്നീ വിഭാഗങ്ങളിൽ വാർഷിക വരുമാനം രണ്ടുലക്ഷത്തിൽ താഴെയും പ്രതിമാസ ഉപഭോഗം 15 കിലോ ലിറ്ററിൽ താഴെയുമാണെങ്കിൽ വർധിപ്പിച്ച വെള്ളക്കരത്തിൽ 50​ ശതമാനം ഇളവ്​​ അനുവദിക്കും.

അനാഥാലയങ്ങൾ, വൃദ്ധമന്ദിരങ്ങൾ എന്നിവക്ക്​ 60 കിലോ ലിറ്റർ വരെ പ്രതിമാസ ഉപയോഗത്തിന്​ വർധിപ്പിച്ച വെള്ളക്കരത്തിൽ 50 ശതമാനം ഇളവ്​ നൽകും. സർക്കാർ അനുമതിയോടെയാവും ഇത്​ നടപ്പാക്കുക. വെള്ളക്കരം കുടിശ്ശിക വന്ന ഉപഭോക്താക്കൾക്ക്​ പണമടയ്​ക്കാൻ അദാലത്​ നടത്താനും തീരുമാനിച്ചു.