ഡ്രൈവിങ്​ ടെസ്റ്റിനിടെ യുവതിയോട്​ മോശമായി പെരുമാറി; എം.വി.ഐക്കെതിരെ കേസ്

മലപ്പുറം: ഡ്രൈവിങ്​ ടെസ്റ്റിനിടെ യുവതിയോട്​ മോശമായി പെരുമാറിയെന്ന പരാതിയിൽ മോട്ടോർ വെഹിക്കിൾ ഇൻസ്​പെക്ടർക്കെതിരെ പൊലീസ്​ കേസെടുത്തു. ഇയാളെ ഗതാഗത കമീഷണർ അന്വേഷണവിധേയമായി സസ്​പെൻഡ്​ ചെയ്തു. മലപ്പുറം ആർ.ടി.ഒ ഓഫിസിലെ എം.വി.ഐ സി. ബിജു (50) നെതിരെയാണ് വകുപ്പ്​തല നടപടി. ​

ഡ്രൈവിങ്​ ടെസ്റ്റിൽ പ​ങ്കെടുത്ത യുവതിയുടെ പരാതിയിൽ മലപ്പുറം വനിത പൊലീസാണ്​ കഴിഞ്ഞ ദിവസം കേസെടുത്തത്​​. മലപ്പുറം ആർ.ടി.ഒ പരിധിയിൽ നടന്ന ഡ്രൈവിങ്​ ടെസ്റ്റിനിടെ കാറിൽവെച്ച്​ ഉദ്യോഗസ്ഥൻ ലൈംഗിക ഉദ്ദേശ്യത്തോടെ അപമാനിക്കാൻ ശ്രമിച്ചെന്നായിരുന്നു പരാതി. ഉദ്യോഗസ്ഥനെതിരെ സ്​ത്രീത്വത്തെ അപമാനിച്ചതിന് ഐ.പി.സി 354 (എ) വകുപ്പുകൾ പ്രകാരമാണ്​ കേസ്​. യുവതിയും കുടുംബവും ഗതാഗത മന്ത്രിക്കും മലപ്പുറം ആർ.ടി.ഒക്കും പരാതി നൽകിയിരുന്നു. ഇ

തുമായി ബന്ധപ്പെട്ട ആഭ്യന്തര റിപ്പോർട്ട്​​ മലപ്പുറം ആർ.ടി.ഒ ഗതാഗത​ കമീഷണർക്ക്​​ കൈമാറിയിരുന്നു. ഇതിനു പിന്നാലെയാണ്​ സസ്​പെൻഷൻ​​. ഇയാൾ ​കഴിഞ്ഞ ദിവസങ്ങളിൽ ജോലിക്ക്​ വന്നിട്ടില്ലെന്നും സംഭവത്തെ കുറിച്ച്​ വകുപ്പ്​തല അന്വേഷണം നടക്കുന്നുണ്ടെന്നും മലപ്പുറം ആർ.ടി.ഒ സി.വി.എം. ശരീഫ് 'മാധ്യമ'ത്തോട്​​ പ്രതികരിച്ചു. അതേസമയം​ കേസെടുത്തെങ്കിലും പ്രതിയായ ഉദ്യോഗസ്ഥൻ ഒളിവിലായതിനാൽ അറസ്റ്റ്​ രേഖപ്പെടുത്തിയിട്ടില്ലെന്നാണ്​ പൊലീസ്​ നൽകുന്ന വിവരം.