തില്ല​ങ്കേരിയിലെ ഉപതെരഞ്ഞെടുപ്പ്​: കള്ളവോട്ട്​ തടയാൻ നടപടി വേണമെന്ന്​ ഹൈകോടതി

കൊച്ചി: കണ്ണൂർ ജില്ല പഞ്ചായത്തിലെ തില്ലങ്കേരി ഡിവിഷനിൽ വ്യാഴാഴ്​ച നടക്കുന്ന ഉപതെരഞ്ഞെടുപ്പിൽ കള്ളവോട്ടും ആൾമാറാട്ടവും ബൂത്തുപിടിത്തവും തടയാൻ കർശന നടപടിക്ക്​ ​ൈഹകോടതി നിർദേശം. പ്രശ്​നബാധിത ബൂത്തുകളുള്ള ഡിവിഷനിൽ സ്വതന്ത്രമായ തെരഞ്ഞെടുപ്പ്​ ഉറപ്പുവരുത്താൻ പൊലീസ്​ സംരക്ഷണമടക്കം ആവശ്യപ്പെട്ട്​ യു.ഡി.എഫ് സ്ഥാനാർഥി ലിൻഡ ജയിംസി​െൻറ മുഖ്യ തെരഞ്ഞെടുപ്പ്​ ഏജൻറ്​ റോജസ് സെബാസ്​റ്റ്യൻ നൽകിയ ഹരജിയിലാണ്​ സംസ്ഥാന തെരഞ്ഞെടുപ്പ് കമീഷനും പൊലീസിനും ജസ്​റ്റിസ്​ അനിൽ ​കെ. നരേന്ദ്രൻ ഈ നിർദേശം നൽകിയത്​. ഹരജി 28ന്​ വീണ്ടും പരിഗണിക്കും.

ഡിവിഷനിലെ 64 ബൂത്തുകളും പ്രശ്നസാധ്യതയുള്ളവയാണെന്ന്​ കമീഷൻ അറിയിച്ചതിനെത്തുടർന്ന്​ തെരഞ്ഞെടുപ്പിന് പൊലീസ് സംരക്ഷണം നൽകണമെന്ന്​ കോടതി നിർദേശിച്ചു. ഉദ്യോഗസ്ഥർ, പോളിങ്​ ഏജൻറുമാർ, വോട്ടർമാർ തുടങ്ങിയവർക്ക് തെരഞ്ഞെടുപ്പിനുമുമ്പും ശേഷവും സംരക്ഷണം ഉറപ്പാക്കണം. എല്ലാ ബൂത്തിലും വിഡിയോഗ്രാഫർമാരെ നിയോഗിക്കണം.

പ്രദേശത്ത് ക്രമസമാധാന പ്രശ്നങ്ങളുണ്ടാകുന്നില്ലെന്ന് പൊലീസ് ഉറപ്പുവരുത്തണ​ം തുടങ്ങിയ നിർദേശങ്ങളും നൽകി. സാങ്കേതിക കാരണങ്ങളാൽ വെബ് കാസ്​റ്റിങ്​ അനുവദിക്കാൻ കഴിയില്ലെന്ന് കമീഷൻ വ്യക്തമാക്കിയതിനെത്തുടർന്ന്​ ഒാപൺ വോട്ട് ചെയ്യേണ്ടിവരുന്ന സാഹചര്യത്തിൽ കേരള പഞ്ചായത്തീരാജ് ചട്ടപ്രകാരം വോട്ടിങ്​ അനുവദിക്കാനും നിർദേശിച്ചു.

യു.ഡി.എഫ് സ്ഥാനാർഥിയുടെ മരണത്തെതുടർന്നാണ് ഡിവിഷനിലെ തെരഞ്ഞെടുപ്പ് മാറ്റി​െവച്ചത്.