കെ- റെയിൽ നടപ്പാക്കും -കാനം രാജേന്ദ്രൻ

കോഴിക്കോട്: കെ- റെയിലിൽ സി.പി.ഐക്കും എൽ.ഡി.എഫിനും ഒരു അഭിപ്രായം മാത്രമേ ഉള്ളൂവെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രൻ മാധ്യമ പ്രവർത്തകരോട് പറഞ്ഞു. കെ- റെയിൽ എൽ.ഡി.എഫിന്‍റെ പരിപാടിയാണ്. പദ്ധതി സർക്കാർ നടപ്പിലാക്കും. കെ-റെയിലിനെ കുറിച്ച് അറിവില്ലാത്തവരാണ് പദ്ധതിയെ എതിർക്കുന്നത്.

പാരിസ്ഥിതിക ആഘാത പഠനം ഉൾപ്പെടെ നടക്കുന്നുണ്ട്. പുതിയ പദ്ധതികൾ എക്കാലത്തും ആശങ്കകൾ ഉണ്ടാക്കിയിട്ടുണ്ട്. അതിനാൽ ജനങ്ങൾക്ക് അഭിപ്രായം പറയാൻ അവകാശമുണ്ട്. സർക്കാർ ഈ ആശങ്കകൾ അകറ്റിയാണ് മുന്നോട്ടു പോവുന്നതെന്നും അലൈൻമെന്‍റ് ഉറപ്പിക്കുന്ന പ്രവൃത്തികൾ നടത്താനാണ് ഇപ്പോൾ എല്ലാവരും സഹകരിക്കേണ്ടതെന്നും അദ്ദേഹം കൂട്ടിച്ചേർത്തു.

കോടഞ്ചേരി നോളജ് സിറ്റി വിവാദത്തിൽ അന്വേഷണ റിപ്പോർട്ട്​ വന്നിട്ട് പ്രതികരിക്കാമെന്നും സ്ഥലം ഇപ്പോൾ സന്ദർശിക്കാൻ ഉദ്ദേശിക്കുന്നില്ലെന്നും കാനം പറഞ്ഞു. എസ്. രാജേന്ദ്രനെ സി.പി.ഐ സ്വാഗതം ചെയ്യുമോ എന്ന മാധ്യമ പ്രവർത്തകരുടെ ചോദ്യത്തിന് നിരവധിപേർ പാർട്ടിയിലേക്ക് വരുന്നുണ്ടെന്നും പ്രാദേശിക ചർച്ചകളുടെ അടിസ്ഥാനത്തിലാണ് അവ നടക്കുകയെന്നും അദ്ദേഹം വ്യക്തമാക്കി.