സഹായത്തിനായി എയർ ഇന്ത്യയുടെ മൂന്ന്​ വിമാനങ്ങൾ കരിപ്പൂരിൽ

കോഴിക്കോട്​: വിവിധ സഹായങ്ങൾക്കായി​ എയർ ഇന്ത്യയുടെ ​മൂന്ന്​ പ്രത്യേക വിമാനങ്ങൾ കരിപ്പൂരിലെത്തി. രണ്ട്​ വിമാനങ്ങൾ ഡൽഹിയിൽനിന്നും ഒന്ന്​ മുംബൈയിൽനിന്നുമാണ്​ വന്നത്​. അപകടത്തിൽപ്പെട്ടവർക്കും അവരുടെ കുടുംബാംഗങ്ങൾക്കും ആവശ്യമായ സഹായ സഹകരണങ്ങൾ നൽകാനും അന്വേഷണത്തിനുമായുള്ള സംഘവുമായാണ്​​ ഇൗ വിമാനങ്ങളെത്തിയത്​.

എയർക്രാഫ്​റ്റ്​ ആക്​സിഡൻറ്​ ഇൻവെസ്​റ്റിഗേഷൻ ബ്യൂറോ (എ.എ.​െഎ.ബി), ഡയറക്​ടറേറ്റ്​ ജനറൽ ഒാഫ്​ സിവിൽ ഏവിയേഷൻ (ഡി.ജി.സി.എ), വിമാന സുരക്ഷ വകുപ്പ്​ അധികൃതർ എന്നിവരും സംഘത്തിലുണ്ട്​​. എ.എ.​െഎ.ബി, ഡി.ജി.സി.എ എന്നിവയുടെ അന്വേഷണ ഉദ്യോഗസ്​ഥർ, എയർ ഇന്ത്യ എക്​സ്​പ്രസി​െൻറ സി.ഇ.ഒ, മറ്റു എയർ ഇന്ത്യ ഉദ്യോഗസ്​ഥർ എന്നിവരടങ്ങിയ വിമാനം ശനിയാഴ്​ച പുലർച്ച രണ്ടിനാണ്​ ഡൽഹിയിൽനിന്ന്​ പുറപ്പെട്ടത്​.

രണ്ടാമത്തെ വിമാനം മുംബൈയിൽ നിന്ന് ശനിയാഴ്​ച രാവിലെ ആറിനാണ്​ തിരിച്ചത്​. പ്രത്യേക സയാഹ സംഘമായ എയ്ഞ്ചൽസ് ഓഫ് എയർ ഇന്ത്യ അംഗങ്ങളും മറ്റു ജീവനക്കാരുമായുമാണ്​ ഇൗ വിമാനം പറന്നത്​. വിവിധ ഏജൻസികളെ ഏകോപിപ്പിച്ച്​ അപകടത്തിൽ ദുരിതമനുഭവിക്കുന്നവരുടെ കുടുംബങ്ങളെ സഹായിക്കുകയുമാണ്​ ഇവരുടെ ലക്ഷ്യം.

മറ്റൊരു വിമാനം ഡൽഹിയിൽനിന്ന്​ രാവിലെ ആറിനാണ്​ പുറപ്പെട്ടത്​. എയർ ഇന്ത്യയുടെ ചെയർമാനും മാനേജിങ്​ ഡയറക്​ടറുമായ രാജീവ്​ ബൻസാലും മറ്റു ഉന്നത ഉദ്യേഗാസ്​ഥരുമാണ്​ ഇൗ വിമാനത്തിലുള്ളത്​. ഇത്​ കൂടാതെ കേന്ദ്ര സഹമന്ത്രി വി. മുരളീധരനും കരിപ്പൂരിലെത്തിയിട്ടുണ്ട്​.

അപകടത്തിൽ 16 യാത്രക്കാരെ കൂടാതെ രണ്ട്​ പൈലറ്റുമാർക്കും ജീവൻ നഷ്​ടമായിരുന്നു. അതേസമയം, നാല്​ കാബിൻ ക്രൂ അംഗങ്ങൾ സുരക്ഷിതരാണെന്ന്​ എയർ ഇന്ത്യ അധികൃതർ അറിയിച്ചു.