ആലപ്പുഴ ജില്ലയിലെ എൻ.ഡി.എ സ്ഥാനാർഥികളിൽ മൂന്നുപേർ സി.പി.എം, സി.പി.ഐ​ വിട്ടെത്തിയവർ

ആലപ്പുഴ: ആലപ്പുഴ ജില്ലയിലെ എൻ.ഡി.എ സ്ഥാനാർഥി ചിത്രം പൂർണമായപ്പോൾ പട്ടികയിൽ ഇടം പിടിച്ച മൂന്നുപേർ എൽ.ഡി.എഫ്​ വി​ട്ടെത്തിയവർ. രണ്ട്​​ പേർ ബി.ഡി.ജെ.എസ്​ സ്ഥാനാർഥികളായും ഒരാൾ ബി.ജെ.പി ടിക്കറ്റിലുമാണ്​ മത്സരിക്കുന്നത്​.

ചേർത്തലയിൽ എൻ.ഡി.എ സ്ഥാനാർഥിയായി മത്സരിക്കുന്ന പി.എസ്​ ജ്യോതിസ്​ സി.പി.എം ​നേതാവും തണ്ണീർമുക്കം പഞ്ചായത്ത്​ മുൻ പ്രസിഡന്‍റുമായിരുന്നു. മാവേലിക്കരയിൽ മത്സരിക്കുന്ന കെ സഞ്ജു ഡി.വൈ.എഫ്.ഐ നേതാവും ഭരണിക്കാവ്​ ​േബ്ലാക്ക്​ പഞ്ചായത്ത്​ മുൻ അംഗവുമായിരുന്നു. അപ്രതീക്ഷിതമായാണ്​ സഞ്​ജു ബി.ജെ.പിയിൽ ചേക്കേറിയത്​.

ഹരിപ്പാട് രമേശ്​ ചെന്നിത്തലക്കെതിരെ ബി.ഡി.ജെ.എസിനായി മത്സരിക്കുന്ന തമ്പി മേട്ടുതറ ആലപ്പുഴ ജില്ല പഞ്ചായത്ത്​ മുൻ​ വൈസ്​ പ്രഡിഡന്‍റും സി.പി.ഐ ജില്ലാ കൗൺസിൽ അംഗവുമായിരുന്നു. സ്ഥാനാർഥി പ്രഖ്യാപനത്തിൽ കാനത്തി​േന്‍റത്​ ഏകാധിപത്യ നിലപാടാണെന്ന്​ ആരോപിച്ചാണ്​ തമ്പി പാർട്ടി വിട്ടത്​.

കോൺഗ്രസ്​ നേതാക്കൾ ബി.ജെ.പിയിൽ ചേരുമെന്ന സി.പി.എം പ്രചാരണത്തെ ചെറുക്കാനായി ആലപ്പുഴയിലെ വിഷയം സജീവമായി രാഷ്​ട്രീയ ആയുധമാക്കാനാണ്​ യു.ഡി.എഫ്​ കേന്ദ്രങ്ങളുടെ ശ്രമം.