തൃക്കാക്കര തെരഞ്ഞെടുപ്പ്: നല്ലത് പ്രതീക്ഷിക്കുന്നതായി ഉമ തോമസ്

എറണാകുളം: തൃക്കാക്കര ഉപതെരഞ്ഞെടുപ്പിൽ മത്സരിക്കുന്നതിനെ കുറിച്ച് പാര്‍ട്ടി തീരുമാനം വരാതെ പ്രതികരിക്കാനില്ലെന്ന് ഉമ തോമസ്. തൃക്കാക്കര വ്യക്തിപരമായി ഏറെ പരിചയമുള്ള മണ്ഡലമാണ്. പി.ടി തോമസ് അച്ചടക്കമുള്ള കോൺഗ്രസ് പ്രവര്‍ത്തകനായിരുന്നു. ആ അച്ചടക്കം തുടരണനാണ് ​ആഗ്രഹിക്കുന്നത്. താനുറച്ച ഈശ്വരവിശ്വാസിയാണെ്, നല്ലത് പ്രതീക്ഷിക്കുന്നതായും ഉമ തോമസ് പറഞ്ഞു. സ്ഥാനാർത്ഥിയെ നിശ്ചയിക്കാനുള്ള കോൺഗ്രസിന്‍റെ ഔദ്യോഗിക ചർച്ച ഇന്ന് നടക്കും.

കോൺഗ്രസിന്‍റെ സിറ്റിംഗ് സീറ്റിൽ പി.ടി. തോമസിന്‍റെ മണ്ഡലത്തിൽ ജയം പാർട്ടിക്ക് അനിവാര്യമാണ്. പി.ടി​യെന്ന വികാരം കൂടി മുതലാക്കാൻ ഉമ തോമസിനെ ഇറക്കാനാണ് നേതൃത്വത്തിന്‍റെ നീക്കം. കെ.പി.സി.സിയിലെ അടിയന്തിര യോഗവും ഉമയുടെ പേരിനാകും മുൻഗണന നൽകുകയെന്നാണ് സൂചന. ഇതിനിടെ, ഉപതെരഞ്ഞെടുപ്പിൽ കെ.​വി. തോമസും മത്സരസാധ്യത തള്ളാതെയാണ് പ്രതികരിക്കുന്നത്.

ഇരുമുന്നണികളുമായി ഇക്കാര്യത്തിൽ ആശയവിനിമയം നടത്തിയിട്ടില്ലെന്നാണ് കെ.വി. തോമസ് പറയുന്നത്. എന്നാൽ, കെ- റെയിലുൾപ്പെടെയുള്ള വികസന രാഷ്ട്രീയത്തിനൊപ്പമാണ് താനെന്ന് തോമസ് ആവർത്തിക്കുന്നത്, ഇടത് മുന്നണി ലക്ഷ്യമിട്ടു​കൊണ്ടാണെന്നാണ് വിലയിരുത്തൽ. ഇക്കാര്യത്തിൽ തുറന്ന് പറയാൻ എൽ.ഡി.എഫ് നേതൃത്വം തയ്യാറായിട്ടില്ല.