തന്നെ ബുദ്ധിമുട്ടിക്കാത്ത കാലംവരെ എൽ.ഡി.എഫിനൊപ്പമെന്ന് തൃശൂർ മേയർ

തൃശൂർ: തന്നെ ബുദ്ധിമുട്ടിക്കാത്ത കാലം വരെ എൽ.ഡി.എഫിനൊപ്പം നിൽക്കുമെന്ന് തൃശൂർ കോർപറേഷൻ മേയർ എം.കെ. വർഗീസ്. നിലവിൽ മറ്റ് ചർച്ചകൾക്ക് സാധ്യതയില്ല. ഇപ്പോഴത്തെ സാഹചര്യത്തിൽ മേയർ സ്ഥാനം അഞ്ച് വർഷം വരെ ആകാമല്ലോ എന്നും വർഗീസ് മാധ്യമങ്ങളോട് വ്യക്തമാക്കി.

പുല്ലഴി ഡിവിഷൻ യു.ഡി.എഫ്​ പിടിച്ചെടുത്തതോടെ തൃശൂർ കോർപറേഷനിലെ എൽ.ഡി.എഫി​െൻറ ഭരണം ഇനി​ കോൺഗ്രസ്​ വിമതനായി ജയിച്ച മേയർ എം.കെ. വർഗീസിന്‍റെ മാത്രം കാരുണ്യത്തിലാവും. ​നെട്ടിശ്ശേരി ഡിവിഷനിൽ നിന്ന്​ തെരഞ്ഞെടുക്കപ്പെട്ട വർഗീസിനെ ഏറെ വില പേശലിന്​ ശേഷം രണ്ട്​ വർഷത്തേക്ക്​ മേയറാക്കാമെന്ന ഉറ​പ്പോടെയാണ്​ എൽ.ഡി.എഫ്​ കൂടെ കൂട്ടിയത്​.

പുല്ലഴി ഡിവിഷൻ കോൺഗ്രസ്​ സ്ഥാനാർഥി കെ. രാമനാഥൻ 993 വോട്ടി​െൻറ ഭൂരിപക്ഷത്തിനാണ്​ ഡിവിഷൻ പിടിച്ചെടുത്തത്. എൽ.ഡി.എഫ്​ സ്വതന്ത്രൻ അഡ്വ. മഠത്തിൽ രാമൻകുട്ടിക്ക്​ 1049 വോട്ട്​ ലഭിച്ചപ്പോൾ കെ. രാമനാഥൻ 2042 വോട്ട്​ നേടി. ബി.ജെ.പിയുടെ സന്തോഷ്​ പുല്ലഴിക്ക്​ 539 വോട്ടാണ്​ കിട്ടിയത്​. ആം ആദ്​മി പാർട്ടിയുടെ ജോഗിഷ്​ എ. ജോണിന്​ 33 വോട്ടും സ്വത​ന്ത്രന്മാരായ ആൻറണി പുല്ലഴിക്ക്​ 59 വോട്ടും ജോഷി തൈക്കാടന്​ 11 വോട്ടുമാണ്​ കിട്ടിയത്​.

കഴിഞ്ഞ കോർപറേഷൻ ഭരണസമിതിയുടെ അവസാന കാലത്ത്​ കോൺഗ്രസ്​ വിട്ട്​ എൽ.ഡി.എഫിനൊപ്പം ചേർന്ന മുൻ പ്രതിപക്ഷ കക്ഷി നേതാവ്​ അഡ്വ. എം.കെ. മുകുന്ദനെയാണ്​ ഇക്കഴിഞ്ഞ തെരഞ്ഞെടുപ്പിൽ എൽ.ഡി.എഫ്​ പുല്ലഴിയിൽ സ്ഥാനാർഥിയാക്കിയത്​. തെരഞ്ഞെടുപ്പിന്​ മുമ്പ്​ മുകുന്ദൻ മരിച്ചതിനെ തുടർന്നാണ്​ ഡിവിഷനിൽ വോ​ട്ടെടുപ്പ്​ മാറ്റിവെച്ചത്​. മുൻ​ കോൺഗ്രസ്​ കൗൺസിലറായിരുന്നു, വർഷങ്ങളായി പാർട്ടിയുമായി ബന്ധമില്ലാത്ത അഡ്വ. മഠത്തിൽ രാമൻകുട്ടിയെ സ്ഥാനാർഥിയാക്കി ഡിവിഷൻ നിലനിർത്താനുള്ള എൽ.ഡി.എഫ്​ തന്ത്രമാണ്​ ​പാളിയത്​.