തുന്നൽ ടീച്ചറെന്താ ടീച്ചറല്ലേ; ശൈലജ ടീച്ചറെ അനുകരിച്ച് ആവർത്തന വീണ്ടും​ വൈറൽ

മീഡിയവണ്‍ സ്പെഷ്യല്‍ എഡിഷനില്‍ ആരോഗ്യ മന്ത്രി ശൈലജ ടീച്ചര്‍ നടത്തിയ പ്രതികരണം അനുകരിച്ച കുട്ടിതാരത്തിന്‍റെ വീഡിയോ വൈറലാവുന്നു. ബി.ജെ.പി നേതാവ് ബി.ഗോപാലകൃഷ്ണന്‍റെ ആരോപണത്തിന് മന്ത്രി നല്‍കിയ പ്രതികരണമാണ് ടിക്ടോക് വീഡിയോയിലൂടെ ആവർത്തന എന്ന കുട്ടിതാരം അനുകരിച്ചിരിക്കുന്നത്​. 

'നിങ്ങളുടെ പ്രവര്‍ത്തകര്‍ തുന്നല്‍ ടീച്ചര്‍ എന്നൊക്കെ പറഞ്ഞ് പോസ്റ്റിട്ടു. എനിക്ക് വിരോധമൊന്നുമില്ല ഗോപാലകൃഷ്ണാ. തുന്നല്‍ ടീച്ചറെന്താ ടീച്ചറല്ലേ. അങ്ങനെയാന്നും പരിഹസിച്ചിട്ട് ഇതാക്കാമെന്ന് വിചാരിക്കണ്ട'; തനിക്കെതിരായ ബി.ജെ.പിയുടെ സോഷ്യല്‍ മീഡിയ പരിഹാസങ്ങള്‍ക്ക്​ ശൈലജ ടീച്ചര്‍ മറുപടി നല്‍കുകയായിരുന്നു.

മുൻപ് നിയമസഭയിൽ ശൈലജ ടീച്ചർ നടത്തിയ പ്രസംഗവും ആവര്‍ത്തന ടിക്ടോക്കില്‍ അനുകരിച്ച് ശ്രദ്ധ നേടിയിരുന്നു. ഇത് കണ്ട് മന്ത്രി തന്നെ നേരിട്ട് വിളിച്ച് അഭിനന്ദിച്ചിരുന്നു. ശൈലജ ടീച്ചറുടെ അതെ വസ്ത്ര-ഭാവങ്ങളോടെയാണ് ആവര്‍ത്തന വീഡിയോയിലെത്തിയിരിക്കുന്നത്. വീഡിയോക്ക് താഴെ അഭിനന്ദനങ്ങളുമായി നിരവധി പേരാണ് എത്തിയിരിക്കുന്നത്.