പീഡനം: എസ്​.പി പൂങ്കുഴലിക്കെതിരെ നടപടി ആവശ്യപ്പെട്ട്​ ​ഇരയുടെ ഹരജി

തൃശൂർ: തൃശൂർ എസ്​.പി ജി. പൂങ്കുഴലി, എസ്​.എച്ച്​.ഒ സിബിൻ എന്നിവർക്കെതിരെ നടപടി സ്വീകരിക്കണമെന്നാവശ്യപ്പെട്ട്​ ഒളിമ്പ്യൻ മയൂഖ ജോണിയുടെ സുഹൃത്തായ, പീഡനത്തിന്​ ഇരയായ യുവതി സംസ്ഥാന പൊലീസ്​ മേധാവിക്ക്​ ഹരജി നൽകി. പ്രതിയുടെ സ്വാധീനത്തിന്​ വഴങ്ങി വ്യക്തിവിവരങ്ങൾ പൊതുചർച്ചക്ക്​ വിധേയമാക്കി അപമാനിച്ച എസ്​.പിയുടെ മേൽനോട്ടത്തിലുള്ള അന്വേഷണം നീതി നൽകില്ലെന്ന്​ ഹരജിയിൽ ആരോപിക്കുന്നു.

തൃശൂർ പ്രസ്​ക്ലബിൽ നടത്തിയ വാർത്തസമ്മേളനത്തിനു ശേഷം താനും പ്രതിയുമായി നിയമയുദ്ധങ്ങൾ നടക്കുന്നുണ്ടെന്ന്​ എസ്​.പി അഭിപ്രായ പ്രകടനം നടത്തി. എന്നാൽ, താനോ കുടുംബമോ പ്രതിക്കെതിരെ സിവിലായോ ക്രിമിനലായോ ഒരു പരാതി പോലും നൽകിയിട്ടില്ല. ഈ സാഹചര്യത്തിൽ എസ്.പി വാർത്തലേഖകരോട്​ പറഞ്ഞത്​ പ്രതിയെ സഹായിക്കാനാണെന്നും അവർ ഹരജിയിൽ ആരോപിച്ചു.