ട്രാന്‍സ്‌ജെന്‍ഡര്‍ ദമ്പതികള്‍ക്ക് വിവാഹ ധനസഹായം നൽകും -മന്ത്രി ശൈലജ

തിരുവനന്തപുരം: നിയമപരമായി വിവാഹം ചെയ്ത ട്രാന്‍സ്‌ജെന്‍ഡര്‍ ദമ്പതികള്‍ക്ക് 30,000 രൂപ വീതം വിവാഹ ധനസഹായം നല്‍കും. ഇതിന്​​ മൂന്ന്​ ലക്ഷംരൂപ അനുവദിച്ചതായി മന്ത്രി കെ.കെ. ശൈലജ അറിയിച്ചു. ശസ്ത്രക്രിയയിലൂടെ പൂര്‍ണമായി സ്ത്രീയോ പുരുഷനോ ആയി മാറി നിയമപരമായി വിവാഹം ചെയ്ത ദമ്പതികള്‍ക്കാണ് ധനസഹായം. അപേക്ഷകരില്‍ ഒരാള്‍ മാത്രം ട്രാസ്​ജെന്‍ഡര്‍ വ്യക്തിയാണെങ്കിലും ധനസഹായത്തിന് അര്‍ഹതയുണ്ട്​.

നിബന്ധനകൾ: ട്രാന്‍സ്‌ജെന്‍ഡര്‍ തിരിച്ചറിയല്‍ കാര്‍ഡ് ഉണ്ടായിരിക്കണം. വിവാഹശേഷം ആറുമാസത്തിനും ഒരു വര്‍ഷത്തിനുമിടയിൽ സഹായത്തിന്​ അപേക്ഷ നൽകണം. വിവാഹ സര്‍ട്ടിഫിക്കറ്റി​​​െൻറ സാക്ഷ്യപ്പെടുത്തിയ പകര്‍പ്പ് ഹാജരാക്കണം. ദമ്പതികള്‍ ഒന്നിച്ചുതാമസിക്കുന്നതായി ജനപ്രതിനിധിയുടെ സാക്ഷ്യപത്രം ഹാജരാക്കണം. വിവാഹ ധനസഹായം ഒരിക്കല്‍ ലഭിച്ചുകഴിഞ്ഞ്​ വിവാഹബന്ധം വേര്‍പെടുത്തി പുനര്‍വിവാഹം കഴിക്കുകയാണെങ്കില്‍ വീണ്ടും സഹായത്തിന് അര്‍ഹതയുണ്ടാകില്ല.