സ്ഥലം വിൽക്കാനുള്ള നീക്കം വീണ്ടുംപാളി; ‘പ്രാരാബ്​ധം’ ഒഴിയാതെ ട്രാവൻകൂർ സിമന്‍റ്​സ്

കോട്ടയം: കടുത്ത സാമ്പത്തിക പ്രതിസന്ധി നേരിടുന്ന ദ ട്രാവൻകൂർ സിമന്‍റ്​സ്​ ലിമിറ്റഡ്​ ഭൂമി വിൽക്കാൻ നടത്തിയ നീക്കം വീണ്ടും പാളി. ഇതോടെ നാലാം തവണയും ടെൻഡർ ക്ഷണിച്ചു. എറണാകുളം കാക്കനാടുള്ള ഭൂമി വിറ്റ്​ പ്രതിസന്ധി പരിഹരിക്കാനുള്ള ശ്രമമാണ്​ പരാജയപ്പെട്ടത്​. സർക്കാർ അനുമതി ലഭിച്ചതോടെയാണ്​ ഭൂമി വിൽപനക്ക്​ ടെൻഡർ ക്ഷണിച്ചത്​. ടെൻഡർ സമർപ്പിച്ച വ്യക്തി ആദ്യഗഡു പണമോ രേഖകളോ ഹാജരാക്കിയില്ല. തുടർന്നാണ്​ വീണ്ടും ടെൻഡർ വിളിക്കാനുള്ള തീരുമാനം. അതിന്‍റെ അടിസ്ഥാനത്തിൽ പത്രപരസ്യം നൽകി. ആഗസ്റ്റ്​ ഒമ്പതിനകം ടെൻഡർ സമർപ്പിക്കണമെന്നാണ്​ ആവശ്യം.

ഒരുകാലത്ത്​ സംസ്ഥാനത്തിന്‍റെ അഭിമാനമായിരുന്ന ട്രാവൻകൂർ സിമന്‍റ്​സ്​ കുറച്ചുകാലമായി കടുത്ത സാമ്പത്തിക പ്രതിസന്ധിയിലാണ്​. അഞ്ചുവർഷം മുമ്പ്​ വിരമിച്ചവർക്കുൾപ്പെടെ ആനുകൂല്യം നൽകാനാകാത്ത സാഹചര്യമാണ്​. വിരമിച്ചവർ കോടതിയെ സമീപിക്കുകയും ചെയ്​തു. അതിന്‍റെ അടിസ്ഥാനത്തിലാണ്​ എറണാകുളം കാക്കനാട്ടുള്ള 113 ആർ സ്ഥലവും കോട്ടയം ചെമ്പിലുള്ള സ്ഥലവും വിൽക്കാനുള്ള തീരുമാനം ബോർഡ്​ കൈക്കൊണ്ടത്​. അതിന്‍റെ അടിസ്ഥാനത്തിൽ അനുമതിക്കായി സംസ്ഥാന സർക്കാറിനെ സമീപിച്ചു. അങ്ങനെയാണ്​ കാക്കനാട്ടുള്ള വസ്തു വിറ്റ്​ ബാധ്യത തീർക്കാൻ വ്യവസായ വകുപ്പ്​ അനുമതി നൽകിയത്​.

അങ്ങനെ അന്താരാഷ്ട്ര പത്രങ്ങളിലുൾപ്പെടെ മൂന്നുതവണ ടെൻഡർ ക്ഷണിച്ചുള്ള പരസ്യവും നൽകി. എന്നാൽ, കാര്യമായ പ്രതികരണം ഉണ്ടായില്ല. കൃത്യമായ രേഖകൾ ഇല്ലാത്തതിനാൽ ചെമ്പിലെ ഭൂമി വിൽപനക്കുള്ള നടപടിക്രമങ്ങൾ നടന്നതുമില്ല. അതിനൊടുവിലാണ്​ ഒരാൾ ടെൻഡർ സമർപ്പിച്ചത്​. 23.5 കോടിക്കാണ്​ ടെൻഡറായത്​. എന്നാൽ, ആദ്യഗഡു പോലും കൈമാറിയില്ല.

അതിന്‍റെ അടിസ്ഥാനത്തിലാണ്​ സർക്കാറുമായി ആലോചിച്ച്​ പുതിയ ടെൻഡർ ക്ഷണിച്ചത്​. അടുത്തിടെയാണ്​ ട്രാവൻകൂർ സിമന്‍റ്​സിന്‍റെ ചെയർമാനായി സണ്ണി തെക്കേടം ചുമതലയേറ്റത്​. അദ്ദേഹത്തിന്‍റെ നേതൃത്വത്തിൽ സ്ഥാപനത്തെ കരകയറ്റാനുള്ള നീക്കങ്ങൾ നടക്കുന്നുണ്ട്​. എന്നാൽ, സർക്കാർ പ്രഖ്യാപിച്ച ആനുകൂല്യങ്ങൾ ഉൾപ്പെടെ ലഭിക്കാത്തതും സ്ഥാപനത്തിന്‍റെ പ്രതിസന്ധി വർധിപ്പിക്കുകയാണ്​.

155 ജീവനക്കാരാണ്​ കമ്പനിയിലുള്ളത്​. പി.എഫ്​ ഉൾപ്പെടെ സ്റ്റാറ്റ്യൂട്ടറി കുടിശ്ശിക കൊടുത്തുതീർക്കാൻ 2.5 കോടിയും പ്രവർത്തന മൂലധനമായി കഴിഞ്ഞ ബജറ്റിൽ 1.5 കോടിയും സർക്കാർ അനുവദിച്ചിരുന്നെങ്കിലും ആ തുക ഇതുവരെ ലഭിച്ചിട്ടില്ല. ഒമ്പതുമാസമായി ജീവനക്കാർക്ക്​ കൃത്യമായി ശമ്പളം ലഭിക്കുന്നുമില്ല​. ജീവനക്കാരുടെ പി.എഫ്​ അടക്കാത്ത സാഹചര്യവുമുണ്ട്​. ക്ലിങ്കർ ഇറക്കുമതി ചെയ്യാത്തതിനാൽ ഒന്നരമാസമായി ഉൽപാദനവും നിലച്ച അവസ്ഥയിലാണ്​. ഈ ഭൂമി വിൽപനകൂടി നടന്നില്ലെങ്കിൽ കേരളത്തിന്‍റെ അഭിമാനമായിരുന്ന ഒരുസ്ഥാപനം കൂടി അടച്ചുപൂട്ടേണ്ടിവരുന്ന സാഹചര്യമാണുള്ളത്​.